بەمەرج مووچەى خانەنشینانى یەکەى 70 خەرجکرا

ناوەندی هەواڵ

وەزارەتى دارایى و ئابووریى حکومەتى هەرێمى کوردستان ڕایگەیاند، بڕیاریداوە بە بەخەرجکردنی مووچەی مانگی ئابی خانەنشینانی هێزەکانی یەکەی 70ی یەکێتی بەو مەرجەی تا کۆتایی ئەمساڵ دۆسیەی سەرجەم خانەنشینانی هێزەکانی یەکەی حەفتا ڕەوانەی بەڕێوبەرایەتی خانەنشینی لەوەزارەتی پێشمەرگە بکرێت.

وەزارەتی دارایی و ئابووری هەرێم  لە راگەیەندراوێکدا بڵاویکردووەتەوە، وەزیری دارایی بڕیاریدا بەخەرجکردنی مووچەی مانگی ئابی خانەنشینانی هێزەکانی یەکەی 70، ئەوەش لەسەر بنەمای گفتوگۆ و رێککەوتنی نێوان وەزارەتی دارایی و نووسینگەی جێگری سەرۆک وەزیرانی هەرێمی کوردستان و وەزارەتی پێشمەرگە.

بەپێی ڕاگەیەندراوەکە، پێویستە تا کۆتایی ئەمساڵ دۆسیەی سەرجەم خانەنشینانی هێزەکانی یەکەی 70 رەوانەی بەڕێوبەرایەتیی خانەنشینی لە وەزارەتی پێشمەرگە بکرێت و دوای وردبینی و پەسەندکردنی دۆسیەکان رەوانەی وەزارەتی دارایی بکرێن.

وەزارەتى دارایى ئاماژەى بەوەشکردووە، بەبڕیاری وەزیری دارایی و ئابووری تەمویلی مووچەی مانگی ئابی خانەنشینانی هێزەکانی یەکەی 70 کراوە و لەسەرەتای هەفتەی داهاتوو مووچەکانیان دابەشدەکرێت.