عیراق بە بەهای زیاتر لە 17 ملیۆن دۆلار ئیندۆمی هاوردەکردووە

ناوەندی هەواڵ

ساڵی ڕابردوو عیراق بە بەهای 17.7 ملیۆن دۆلار ئیندۆمی هاوردە کردووە و بانکی فیدراڵیی ئەمریکاش سەری لەو ژمارەیە سوڕماوە.

نەبیل مەرسومی، شارەزای بواری ئابووری لە هەژماری رەسمیی خۆی لە تۆڕی کۆمەڵایەتیی فەیسبووک دەڵیت، بەپێی داتاکانی دەستەی گشتی گومرگ، عیراق لە ساڵی ڕابردوودا لە سەرجەم دەروازە سنوورییەکان جگە لە دەروازەکانی هەرێمی کوردستان، 64 هەزار و 185 تۆن ئیندۆمی بە بەهای 17.7 ملیۆن دۆلار هاوردەکردووە، کە ئەمەش بەراورد بە ساڵی 2022 بە رێژەی 18% زیادی کردووە.

دەشڵێت، پێدەچێت بەهای هاوردەکردنی ئیندۆمی زۆر زیاتر بێت لەو ژمارەیە و رەنگە لە داهاتوودا  50 ملیۆن دۆلار تێپەڕێنێت.

مەرسومی ڕاشیگەیاندووە، بانکی فیدراڵیی ئەمریکا سەری لەو ژمارەیە سوڕماوە و پرسیاری ئەوەیان کردووە، کە ئایا عیراقییەکان بەو رادەیە حەزیان لە ئیندۆمییە؟ یاخود ئەمە ئامرازێکە بۆ بردنەدەرەوەی پارە بە قاچاخ.