ئەمریكا لەسەر ئاستی نێردە پشتیوانی بۆ سەرۆكوەزیرانی نوێی عێراق ڕاگەیاند

نێردەی دیپلۆماسیی ئەمریكا لە عێراق، هەڵوێستی رەسمی خۆی لەسەر ڕاسپاردنی سەرۆكوەزیرانی نوێ ڕاگەیاند، دابینكردنی ئاسایش و سەروەری بە كاری لە پێشینەی عەلی زەیدی دادەنێت.

نێردەی دیپلۆماسیی ئەمریكا لە عێراق، لە ڕێگەی كونسوڵخانەی وڵاتەكەی لە هەولێر، هیوای سەركەوتن بۆ عەلی زەیدی، سەرۆكوەزیرانی ڕاسپێردراو دەخوازێت، بۆ پێكهێنانی حكومەتێك كە توانای بەدیهێنانی خواستەكانی سەرجەم هاووڵاتیانی عیراقی هەبێت بۆ داهاتوویەكی گەشتر و ئارامتر.

نێردەی دیپلۆماسی ئەمریكا ڕایدەگەیەنێت، ئەمریكا پاڵپشتی لە خەڵكی عێراق دەكات لە هیواخواستنیان بۆ ئامانجە هاوبەشەكان، كە سەرەكیترینیان پاراستنی سەروەریی عیراق و چەسپاندنی ئاسایشە. دووپاتیشی دەكاتەوە پێویستە ئاسایشی وڵات خاڵی بێت لە هەڕەشەكانی تیرۆر بۆ ئەوەی زەمینەی سەقامگیری بڕەخسێت.

بەشێكی تری ڕاگەیەندراوەكەی نێردەی دیپلۆماسیی ئەمریكا لە عێراق، ئاماژە بە بونیادنانی داهاتوویەكی خۆشگوزەران دەكات.

دەشڵێت ئامانج لەم هەنگاوە ئەوەیە كە ببێتە مایەی سوودی بەرجەستە بۆ هاووڵاتیانی ئەمریكی و عیراقی و پەرە بە بەرژەوەندییە هاوبەشەكانی نێوان هەردوو وڵات بدرێت.

یەکلاکردنەوەی سەرۆکوەزیران

شەوی 27 ی نیسان چوارچێوەی هەماهەنگی كاندیدی سەرۆكوەزیرانی یەكلاكردەوە و رێككەوتن لەسەر دیاریكردنی عەلی فالح كازم ئەلزەیدی وەك كاندیدی سەرۆكوەزیران، دواتر نزار ئامێدی سەرۆك كۆماری عێراق بە ڕەسمی عەلی زەیدی بۆ پێكهێنانی حكومەت ڕاسپارد، ئێستا كاتێكی دەستوری لەبەردەمدایە بۆ پێكهێنانی كابینەی حكومەتەكەی و بەدەستهێنانی متمانەی پەرلەمان.

كاندیدی سازش لەسەركراو بە دۆسیەیەكی نائاساییەوە

عەلی زەیدی پیاوێكی بازرگان و پسپۆڕی دارایی و یاساییە، كاندێكی سازش لەسەركراوە زیاتر لەوەی كەسایەتییەكی سیاسی كلاسیكی بێت، زیاتر پسپۆڕیەكەی لە كەرتی بانكی و ئیداریدایە، لەگەڵ ئامادەبوونێكی سنورداری پێشووی لە دیمەنی سیاسیدا.

ئەم كارەكتەرە تەكنۆكراتییە، پەراوێزێكی فراوانتری قبوڵكردنی ناوخۆیی پێدەدات، بەڵام لە بەرامبەردا پرسیار دەربارەی توانای لە مامەڵەكردن لەگەڵ دۆسیە ئەمنیی و سیاسییە ئاڵۆزەكاندا دروست دەبێت.

ئاڵنگارییە گەورەكە؛ كۆنترۆڵكردنی ئەمنیی و چەكی دەرەوەی دەوڵەت

زەیدی لە ناوخۆدا ڕوبەڕووی ئاڵۆزی زۆر دەبێتەوە، لەوانەش دۆسیەی چەكی دەرەوەی دەوڵەت و گروپە چەكدارەكان، لەگەڵ ناكۆكی نێوان هێزە سیاسییە شیعە و سوننە و كوردییەكان، هەروەها بەردەوامیی هەڕەشەی ئەمنیی لە چەند ناوچەیەك.

سەركەوتنی لەم دۆسیانە دەبێتە هۆكارێكی یەكلاكەرەوە بۆ بەردەوامیی حكومەتەكەی، بەتایبەت كە حكومەتەكانی پێشوو تووشی قورسیی بوونەتەوە لە ڕاگرتنی باڵانس لەنێوان دەوڵەت و گروپە چەكدارەكاندا.

ئابوری ژێر فشار و چاكسازی دواخراو

لە تەنیشت دۆسیەی ئەمنییەوە، زەیدی خۆی لەبەردەم ئاڵنگارییەكی نوێدا دەبینێتەوە كە ئەویش ئاستەنگی درێژخایەنی ئابورییە.

ئەو ئاستەنگانەی دێنە بەردەمی سەرۆكوەزیرانە نوێیەكە، پشت بەستنی گەورەیە بە نەوت، بێكاری و دۆسیەی خزمەتگوزاری، گەندەڵی ئیداری و دارایی، هەرچەندە پسپۆڕیەكەی زەیدی داراییە، بەڵام جێبەجێكردنی چاكسازی ڕاستەقینە وادەكات ڕوبەڕووی پێكدادانی سیاسی و بەرەوەندی بەیەكداچووی ڕەگداكوتاوی ناوخۆیی بكاتەوە.

لە دەرەوەش سەرۆكوەزیرانە نوێیەكە ڕوبەڕووی ئیدارەدانی چەند دۆسیەیەكی هەستیاری پەیوەندییەكان دەبێتەوە، پاراستنی هاوبەشی لەگەڵ ئەمریكا، دووركەوتنەوە لە بەرەنگاربوونەوەی ئێران، باشتركردنی پەیوەندییە عەرەبیی و هەرێمیەكان، ئەم دۆسیانەش ئاڵنگاری بوون لەبەردەم حكومەتە یەك لەدوای یەكەكانی عێراق.

تاقیكردنەوەی پێشوەختەی شەرعیەت

زەیدی لە دەرگای رێككەوتنی سیاسیی و وەك كاندیدێكی سازش لەسەركراو هاتە نێو دیمەنی سیاسی عێراق و بازەكە بەسەریەوە نیشتەوە، بەڵام شەرعیەتی كرداری كەوتووەتەوە سەر توانای ئەوەی تا چەند دەتوانێت حكومەتێك دروست بكات كە پەرلەمان پەسەندی بكات، لەگەڵ هێوركردنەوەی دۆخی ئەمنیی و بەدەستهێنانی دەستكەوتی ئابوری.

لە كۆتاییدا، عەلی زەیدی كاندیدی سەرۆكوەزیران، تەنها ڕوبەڕووی تاقیكردنەوەی پێكهێنانی حكومەت نابێتەوە، بەڵكو ڕوبەڕووی تاقیكردنەوەی توانای ئیدارەدانی دەوڵەتێك دەبێتەوە، كە ڕوبەڕووی قەیرانی ناوخۆیی و فشاری دەرەكیی بووەتەوە، بۆیە ئەركەكەی لە مێژووی نوێی عێراقدا قورسترین دەبێت.