سیناریۆکانی دوای کشانی ئەمریکا؛ ئیسرائیل ئازادتر دەبێت و پێشێلکاریی ئاڵاش لە بەغدا نیگەرانی دروست دەکات

کشانەوەی سەربازیی ویلایەتە یەکگرتووەکانی ئەمریکا لە عێراق و کۆتاییهاتنی ئەرکی هاوپەیمانی، دەرگای قۆناغێکی نوێی لە هاوکێشە ئەمنی و سەربازییەکانی ناوچەکەدا کردووەتەوە. لە لایەکەوە ڕاپۆرتە ڕۆژنامەوانییەکان ئاماژە بەوە دەکەن کە ئەم گۆڕانکارییە کۆتوبەندەکانی سەر ئیسرائیلی لە عێراق هەڵگرتووە و دۆخێکی نوێ دەخولقێنێت، لە لایەکی تریشەوە ڕەفتاری هەندێک لە هێزەکان لەگەڵ ئاڵای ئەمریکا لە کاتی ئاهەنگی کشانەوەدا، کاردانەوەی توندی حکومەتی عێراقی و نیگەرانی دیپلۆماتکارانی بیانی لێکەوتووەتەوە.

ڕوانگەی ئیسرائیلی؛ کشانی ئەمریکا بەربەست لەبەردەم ئۆپەراسیۆنەکان دەكاتەوە

ڕۆژنامەی (JFeed)ی ئیسرائیلی لە ڕاپۆرتێکدا هۆشداری دەداتە ئەوەی کە بوونی پێشووی هێزەکانی ئەمریکا لە عێراق وەک کۆتوبەندێک وابووە لەسەر هێرشە ئاسمانییەکانی ئیسرائیل بەهۆی مەترسی بەرکەوتنی هێزە بیانییەکان. لە ئێستادا، دامەزراوەی ئەمنی ئیسرائیل خۆی بۆ گۆڕانکارییەکی قووڵ ئامادە دەکات و پێی وایە کشانەوەی ئەمریکا دوایین بەربەستی لاداوە. ئیسرائیل عێراق وەک بەشێک لە ڕێڕەوێکی ستراتیژی دەبینێت کە لە ئێرانەوە دەست پێدەکات و دەگاتە سووریا و لوبنان، و لە چوارچێوەی "هەڵمەتی نێوان جەنگەکان"دا سەرنجی لەسەر بڕینی ڕێگاکانی گواستنەوەی چەک و بەئامانجگرتنی کاروانە سەربازییەکان دەبێت، کە ئەمەش پێویستی بە فراوانکردنی بازنەی کۆکردنەوەی زانیاری هەواڵگری لە خاکی عێراقدا هەبێت.

ڕووداوی پێشێلکردنی ئاڵا؛ فەرمانی لێکۆڵینەوە و ناڕەزایەتی دیپلۆماسی

لە بەرانبەردا، پرسە ناوخۆییەکانی پەیوەندیدار بە کشانەوەی هێزە بیانییەکان لە عێراق بێدەنگەیان بەدوای خۆیدا نەهێنا. لە کاتی ئاهەنگگێڕان و ڕاگەیاندنی "ڕۆژانی سەروەری"دا، ڕەفتارێک لەلایەن هەندێک لە هێزەکانی حەشدی شەعبییەوە سەبارەت بە پێشێلکردنی ئاڵای ئەمریکا نوێنەرایەتی کرا کە کاردانەوەی لێکەوتەوە. سەباح نوعمان، وتەبێژی فەرماندەی گشتی هێزە چەکدارەکانی عێراق ڕایگەیاند کە فەرماندەیی گشتی فەرمانی دروستکردنی لێکۆڵینەوەی بۆ ئەم پێشێلکارییە دەرکردووە و جەختی لەسەر پێویستی پابەندبوون بە نەریتی دیپلۆماسی و سزادانی تێوەگلاوان کردووەتەوە.

نیگەرانی ئەنجومەنی ئەتڵەسی لە دیمەنەکانی عێراق

لەم چوارچێوەیەدا، ڤیکتۆریا تایلۆر، بەڕێوەبەری دەستپێشخەری عێراق لە ئەنجومەنی ئەتڵەسی، لەسەر سەکۆی ئێکس نیگەرانی خۆی دەربڕی و ئاماژەی بەوە کرد کە سەرەڕای تێگەیشتنی بۆ ئەوەی کە ئەم ڕەفتارانە گوزارشت لە هەموو عێراقییەکان ناکەن، بەڵام بینینی دیمەنی پێنان بە ئاڵای ئەمریکادا لەلایەن هێزە فەرمییەکانەوە جێگەی ناڕەحەتی بووە. ناوبراو پێشی وا بوو کە حکومەتی عێراق دەبوایە ڕەفتاری باشتر و هاوسەنگتری نیشان بدایە بۆ ئەوەی خۆی لە نیشاندانی دژایەتییەکی ئاشکرا لە دژی ئەرکێک بەدوور بگرێت کە پێشتر لەسەر داوای خودی حکومەتی عێراق بۆ روبەڕوبوونەوەی داعش هاتبوو.