ده‌رگای تۆماركردنی سكاڵا و وه‌رگرتنی قه‌ره‌بوو بۆ زیانلێكه‌وتووانی دەستی ڕژێمی پێشوو كرایه‌وه‌

ده‌سته‌ی باڵای نیشتمانی بۆ لێپرسینه‌وه‌ و دادپه‌روه‌ری، له‌ هه‌نگاوێكدا، ده‌رگای پێشكه‌شكردنی سكاڵا و داواكاری بۆ سه‌رجه‌م هاووڵاتییه‌ زیانلێكه‌وتووه‌كانی ده‌سه‌ڵاتی له‌ناوچووی ڕژێمی به‌عس له‌ عیراق كرده‌وه‌.

 ئه‌م ڕێگه‌پێدانه‌ نوێیه‌ ده‌رفه‌تێكی زێڕینه‌ بۆ قوربانییان تاوه‌كو له‌ ڕێگه‌ی پڕكردنه‌وه‌ی "فۆرمی توانابه‌خشین به‌ قوربانییانی ده‌سه‌ڵاتی له‌ناوچوو" و ناردنی له‌ ڕێگه‌ی پۆستی ئه‌لیكترۆنییه‌وه‌، مافه‌ ده‌ستوری و داراییه‌ شایسته‌كانیان به‌ده‌ستبهێنن و كۆتایی به‌و بێده‌نگییه‌ ده‌ستوورییه‌ بهێنن كه‌ ساڵانێكه‌ مافه‌كانی زه‌وت كردوون.

له‌سه‌ر ئه‌م بنه‌مایه‌، نووسه‌ر و ڕۆژنامه‌نووس ئه‌سعه‌د جه‌باری بانگه‌وازێكی به‌په‌له‌ و نیشتمانی ئاراسته‌ی میدیاكاران، كه‌ناڵه‌كانی ڕاگه‌یاندن، دڵسۆزانی نه‌ته‌وه‌كه‌مان و سه‌رجه‌م لایه‌نه‌ سیاسییه‌كانی كوردستان ده‌كات. ناوبراو داوا ده‌كات ده‌ستبه‌جێ هه‌ڵمه‌تێكی فراوان بۆ هۆشیاركردنه‌وه‌ی خه‌ڵك ده‌ستپێبكرێت، چونكه‌ نه‌ته‌وه‌ی كورد به‌ درێژایی مێژووی پڕ له‌ قوربانیدانی له‌ ساڵی  1917ه‌وه‌ تاوه‌كو 2026، ڕووبه‌ڕووی ده‌یان كاره‌ساتی گه‌وره‌ بووه‌ته‌وه‌ و پێویسته‌ ئێستا بێده‌نگ نه‌بێت له‌ به‌ده‌ستهێنانی مافه‌كانی.

وه‌ك له‌ بانگه‌وازه‌كه‌دا هاتووه‌، هه‌ر تاكێكی كورد كه‌ هه‌تا ساڵی 2003  تووشی ده‌یان ڕووداوی ناخۆش، ماڵوێرانی، ئه‌نفال، كیمیاباران، قڕكردن، جینۆساید، كۆڕه‌و، ده‌ربه‌ده‌ری، كووشتار، سووتانی ماڵ، به‌ندیخانه‌ و ئازاردان بووه‌، مافی ته‌واوی هه‌یه‌ سكاڵا تۆمار بكات.

ئه‌سعه‌د جه‌باری نیگه‌رانی قووڵی خۆی ده‌رده‌بڕێت و ده‌ڵێت، كورد به‌ گشتی ئاگای له‌م پرۆسه‌یه‌ نییه‌ و نازانێت چۆن مامه‌ڵه‌ی له‌گه‌ڵ بكات، له‌ كاتێكدا پێكهاته‌كانی تری عێراق له‌ ڕێگه‌ی ئه‌م فۆرم و ئاگادارانه‌وه‌ به‌ ته‌واوی سوود له‌ ماڵ و دارایی وڵات ده‌بینن و كورد له‌ژێر ناوی جیاجیادا ده‌یان گۆڵی لێ ده‌درێت. بۆیه‌ داوا ده‌كات گه‌وره‌ و بچووكی كورد په‌له‌ بكه‌ن و فۆرمه‌كان پڕ بكه‌نه‌وه‌ تاوه‌كو قه‌ره‌بووی كه‌مێك له‌و ئازار و مه‌ینه‌تییه‌ مێژووییانه‌ بكرێنه‌وه‌ كه‌ به‌ درێژایی ده‌یان ساڵ به‌سه‌ریاندا سه‌پێنراوه‌.