بڕیاری ناردنی کۆچبەرانی بۆ ڕواندا هەڵوەشایەوە

ناوەندی هەواڵ

سەرۆکوەزیرانی نوێی بەریتانیا، لە یەکەم رۆژی دەستبەکاربوونی پلانی ناردنی کۆچبەرانی بۆ رواندا هەڵوەشاندەوە، بەمزووانەش رێککەوتنەکەی بەریتانیا و رواندا کۆتایی پێ دەهێنرێت

ئەمڕۆ شەممە6-7-2024،  رۆژنامەى تەلەگرافى بەریتانى بڵاویکردووەتەوە، کییەر ستارمەر، سەرۆکوەزیرانى نوێى بەریتانیا لە یەکەم رۆژى دەسەڵاتەکەیدا، کارکردنى بە یاساى رواندا هەڵوەشاندووەتەوە، کە لە مانگى نیسانى رابردوودا لە لایەن پەرلەمانەوە پەسەندکراوە.

یاساى سەلامەتى رواندا، پلانى ریشى سوناک سەرۆکوەزیرانى پێشووى بەریتانیا بوو بۆ راگرتنى شەپۆلى کۆچبەران و ناردنى کۆچبەران بۆ وڵاتى رواندا، بەتایبەت ئەو کۆچبەرانەى بە نایاسایی روو لە بەریتانیا دەکەن و داواى مافى پەنابەرى دەکەن.

دوێنێ  هەینى کییەر ستارمەر لایەن شا چارلزی سێیەمەوە وەک سەرۆک وەزیرانی نوێی بەریتانیا دەستبەکاربوو و ڕایگەیاند" داوای شا چارڵزم قبووڵ کرد بۆ پێکهێنانی حکومەتی نوێ بۆشایی نێوان خەڵک و دەسەڵات گەورە ببوو، بەڵام لە ئەمڕۆوە گۆڕانکاری ڕاستەوخۆ دەستپێدەکەین و متمانەی خەڵک بە حکومەت بەدەستدەهێنینەوە.