ساڵی نوێی خوێندن لەگەڵ کێشەی دوو دەوامی و سێ دەوامی دەستیپێکردەوە

رۆژی یەکشەممە 20ـی ئەیلوولی 2026، زەنگی ساڵی نوێی خوێندنی (2026-2027) لێدرا و دەرگای قوتابخانەکان بە رووی ملیۆنێک و 750 هەزار قوتابی و خوێندکاردا لە سەرانسەری هەرێمی کوردستان کرایەوە، لە کاتێکدا پرۆسەکە بە کۆمەڵێک ئامادەکاری و ئاماری نوێوە دەست پێ دەکات.

ئامار و داتاکانی ساڵی نوێی خوێندن

بە گوێرەی ئامارە فەرمییەکان، بۆ ساڵی نوێی خوێندنی 2026–2027، ملیۆنێک و 750 هەزار قوتابی و خوێندکار لە حەوت هەزار و 590 قوتابخانەی حکومی و ناحکومیدا دەخوێنن. لەم ژمارەیە، زیاتر لە 150 هەزار قوتابی لە پۆلی یەکەمی بنەڕەتی و 20 هەزار منداڵیش لە باخچەکانی ساوایان ناویان تۆمار کراوە و دەست بە خوێندن دەکەن.

لە لایەکی ترەوە، پرۆسەی خوێندن لەلایەن 168 هەزار مامۆستا و فەرمانبەرەوە سەرپەرشتی دەکرێت، لەگەڵ نزیکەی 38 هەزار مامۆستای وانەبێژ کە لە قوتابخانەکانی هەرێمی کوردستاندا وانە دەڵێنەوە (کە لە 28ـی ئابی 2024 لە لایەن وەزارەتی پەروەردەوە بڕیاری بە گرێبەستبوونیان درا و مووچەی مانگانەشیان بە تێکڕا نزیکەی 19 ملیار دینارە).

ژێرخان، پەرتووک و ڕاهێنانی مامۆستایان

لە لێدوانێکدا، ئالان حەمەسەعید، وەزیری پەروەردەی حکومەتی هەرێمی کوردستان، ئاماری کارەکانی وەزارەتەکەی لە دروستکردن و نۆژەنکردنەوەی قوتابخانەکان، چاپکردنی پەرتووک و راهێنانی مامۆستایان خستەڕوو. بە وتەی بەرپرسانی پەروەردە، لە ماوەی ڕابردوودا کارە زیرەک و پێویستەکان ئەنجامدراون:

·        زیاتر لە 310 قوتابخانەی نوێ دروستکراون.

·        نزیکەی 629 ژووری نوێ بۆ بەشێکی قوتابخانەکان زیادکراون.

·        سێ هەزار و 175 قوتابخانە نۆژەنکراونەتەوە.

·        145 هەزار مامۆستای قوتابخانە حکومییەکان ڕاهێنانیان پێکراوە.

·        زیاتر لە 100 (بە دیاریکراوی 108 جۆر) پرۆگرامی خوێندن گۆڕانکارییان بەسەردا هاتووە و 19 ملیۆن پەرتووکیش چاپکراون.

ساڵنامەی خوێندن و ئاستەنگە بەردەوامەکان

بە گوێرەی ساڵنامەی وەزارەتی پەروەردەی حکومەتی هەرێمی کوردستان، وەرزی یەکەم ئەمڕۆ دەستیپێکرد و لە 72 ڕۆژ پێکهاتووە، هەروەها وەرزی دووەمیش لە 3ی کانوونی دووەمی 2027 دەستپێدەکات و لە 89 ڕۆژ پێکهاتووە.

سەرەڕای ئەم ئامادەکارییانە، ئەمە لە کاتێکدایە کە بەشێکی زۆری قوتابخانەکان تا ئێستاش بە دەست گرفتی دوو دەوامی و سێ دەوامییەوە دەناڵێنن و وەزارەتی پەروەردە هێشتا چارەسەری یەکجاری بۆ ئەم کێشەیە نەدۆزیوەەتەوە، کە ئەمەش وەک ئاستەنگێکی بەردەوام لەبەردەم ڕەوتی پرۆسەی پەروەردەدا دەبینرێت.