کۆبوونەوەیەکى چارەنوسساز لە دەوحە ئەنجام دەدرێت

بڕیارە ئەمڕۆ کۆبوونەوەیەکی چارەنووسساز سەبارەت بە ڕاگەیاندنی ئاگربەستی نێوانی ئیسرائیل و حەماس لە دەوحەی پایتەختی قەتەر بەڕێوەبچێت، بەڵام تا ئێستا دیار نییە ئەو شاندەى بزوتنەوەى حەماس کێێە بەشدارى لەو کۆبونەوەیەدا دەکەن.

بەگوێرەی میدیای ئەمریکی ئەمڕۆ پێنجشەممە، 15ی ئابی 2024 نوێنەرانی ئەمریکا، قەتەر و میسر لە دۆحە کۆدەبنەوە، بۆ بەشداریکردن لە گەڕێکی نوێی گفتوگۆکان بەمەبەستی گەیشتن بە ئاگربەست لە غەززە و راگرتنی ئەو جەنگەی چەند مانگێکە بەردەوامى هەیە.

شاندی ئەمریکا بە سەرۆکایەتی ویلیام بێرنز سەرۆکی دەزگای هەواڵگریی و شاندی ئیسرائیل، بە ئامادەبوونی نوێنەرانی میسر و قەتەری نێوەندگیر بەشدارن،هەرچەندە سەرکردەکانی بزووتنەوەی حەماس لە دەوحەن، بەڵام بەشداریکردنیان لە دانوستانەکە یەکلانەبووەتەوە.

حەماس سوورە لەسەر ئەوەی شەڕی غەززە بە سێ قۆناغ کۆتایی بێت کە ئەوانیش ڕاگەیاندنی ئاگربەست، کشانەوە هێزەکانی ئیسرائیل لە غەززە و گەیاندنی هاوکاریی مرۆیی، پاشان ئازادکردنی دیلە فەڵەسینییەکانن.

پێشتریش فیدانت باتیل، وتەبێژی وەزارەتی دەرەوەی ئەمریکا ڕایگەیاندبوو، هاوبەشە قەتەرییەکانیان هەوڵ دەدەن نوێنەری حەماس لە دانوستانەکاندا ئامادەبن.

لە دوای هێرشەکەی 7ی ئۆکتۆبەری بزووتنەوەی حەماسەوە، ئیسرائیل هێرشێکی کاولکاریی بۆ سەر کەرتی غەززە دەستپێکردووە و تا ئێستا زیاتر لە 30 هەزار کەس کوژراون و زیاتر لە دەیان هەزاری دیکەش برینداربوون.