هۆکاری راگرتنی مووچەی خانەنشینانی هێزەکانی 70 ئاشکرا دەکرێت

ناوەندی هەواڵ

جێگری بەڕێوەبەری خانەنشینی هێزەكانی یەكەی 70ی هێزی پێشمەرگە هۆکارى دابەشنەکردنى مووچەکانیان ئاشکرا دەکات و دەڵێت، بەشێكە لە بانگەشەی هەڵبژاردن.

عادل مەلا تاهیر، جێگری بەڕێوەبەری خانەنشینی هێزەكانی یەكەی 70ی هێزە پێشمەرگە رایگەیاند، بۆچی چەند ساڵێكە بە بێ‌ گرفت مووچەمان خەرجكراوە و لە ئیستادا كە لەهەڵبژاردن نزیك بووینەتەوە گرفت تەنها بۆ خانەنشینی یەكەی 70 دروستدەكرێت و یەکەى 80 هیچ کێشەیەکییان نییە.

وتیشى، ئەوەی بەرامبەر بە خانەنشینانی هێزەكانی یەكەی 70 دەكرێت جۆرێكە لە سزادانی سیاسی، چونکە ئێمە بەهەموو جۆرێك ئەركەكانی خۆمان جێبەجێكردووە و هەرچی پێویست بێت لەرێنماییەكانی چاودێری دارایی هەرێم و بەغدا جێبەجێمان كردووە، بۆیە پێمانوایە دروستكردنی ئەم گرفتە لەلایەن حكومەتەوە وەك بانگەشەی هەڵبژاردن بەكار دەهێنرێت.

بەوتەى عادل مەلا تاهیر  هێزەكانی یەكەی 70 كەمترین كێشەی هەیە لەڕووی ئامارو ژمارەوە بە خانەنشینیشەوە، بەراورد بە هێزەكانیی یەكەی 80 ، بەڵام دروستكردنی ئەم كێشەیە لەم كاتی هەڵبژاردنەدا روونە كە پەیوەندی بە بەكارهێنانی ئەم دۆسێیەوە هەیە بۆ بانگەشەی هەڵبژاردن كە ئەمەیان پێچەوانەی یاسا و رێنماییەكانی كۆمسیۆنە.

ژمارەی خانەنیشنانی هێزەکانی 70 نزیکەی نۆ هەزار کەسەو گوژمەی مووچەیان نزیکەی چوار ملیار دینارە و پێشتر وەزارەتی دارایی‌و ئابوریی هەرێم یەکەی 70 ئاگادارکردوەتەوە، بەرپرسیارنین لەدواکەوتن‌و نەدانی موچەکانیان، بەڵکو پێویستە فەرماندەیی هێزەکانی یەکەی (70) کاربکات بۆ ئەوەی بەزووترینکات دۆسیەکانیان بگوازرێتەوە سەر بەڕێوەبەرایەتیی گشتیی خانەنیشنی.