هاوپەیمانیەکەی مالکی داوا لە هەرێمی كوردستان دەكات وەكو دەوڵەت مامەڵە نەكات

ناوەندی هەواڵ

هاوپەیمانی دەوڵەتی یاسا كە نوری مالیكی سەرۆكوەزیرانی پێشووتری عێراق سەرۆكایەتی دەكات، داوا لە هەرێمی كوردستان دەكات بە سیاسەتەكانیدا بچێتەوە و وەكو هەرێمی كوردستانی دوای 2003 مامەمەڵە نەكات.

عەباس مالكی، یەكێك لە سەركردەكانی هاوپەیمانی دەوڵەتی یاسا كە نوری مالیكی سەرۆكوەزیرانی پێشووی عێراق سەرۆكایەتی دەكات، لە لێدوانێكدا بۆ میدیای عێراقی ڕایگەیاندووە: "هەرێمی كوردستان بەدرێژایی ساڵانی ڕابردوو وەكو دەوڵەتێك مامەڵەی كردووە و هەموو هەوڵێكی حكومەتی عێراقی بۆ سەپاندنی یاسای دەوڵەتی عێراق ڕەتكردووەتەوە، لەوانەش بڵاوەپێكردنی سوپای عێراق و سەرپەرشتیكردنی نەوت و غاز و سەرپەرشتیكردنی پرۆژە ئابورییەكان".

وتیشی:"ئەو قۆناغەی ئێستا پێی گەیشتووین زۆر مەترسیدار و هەستیارە سەبارەت بە هەرێمی كوردستان، ئێران و توركیا وا هەست دەكەن كوردستان بووەتە مەترسی بۆ سەر ئاسایشی نەتەوەییان، عێراق ناتوانێت ڕووبەڕووی ئەو دوو دەوڵەتە بوەستێتەوە بەهۆی نەبوونی سوپایەكی بەهێز".

ئەو سەركردەیەی دەوڵەتی یاسا دەڵێت "سەرەڕای بوونی دڵنیایی بۆ دەوڵەتانی دراوسێ كە عێراق نابێتە مەترسی بۆیان و هێزەكانی عێراق لەسەر سنورەكانیان جێگیركراوە، داوا لە حكومەتی هەرێمی كوردستان دەكەین بە سیاسەتەكانیدا بچێتەوە كە بۆخۆی دروستكردووە لەدوای ساڵی 2003 ەوە".

وتەكانی ئەو سەركردەیەی هاوپەیمانی دەوڵەتی یاسا لەكاتێكدایە، زۆرێك لە حزبە نەیارەكانی كۆماری ئیسلامی ئێران و توركیا بارەگایان لە هەرێمی كوردستان هەیە، هەریەك لە ئێران و توركیاش ڕێككەوتنیان لەگەڵ عێراق و هەرێم بۆ دەرپەڕاندنی بارەگای ئەو حزبە كوردیانە واژۆ كردووە.

لەنوێترین پێشهاتدا دوێنێ محەمەد شیاع سودانی سەرۆكوەزیرانی عێراق بە سەردانێكی پێشتر ڕانەگەیەندراو سەردانی توركیای كرد و لەگەڵ ڕەجەب تەیب ئەردۆغان سەرۆككۆماری توركیا وژمارەیەك بەرپرسی باڵای دیكەی توركیا كۆبوەوە، بۆیە گومان دەكرێت لێدوانی ئەو سەركردەیەی هاوپەیمانی دەوڵەتی یاسا لەمكاتەدا ئاماژەی ڕێككەوتنێكی نهێنی بێت.