ڕاوێژکارێکى سودانى: شانازى بە هێرشەکانى مقاوەمەى ئیسلامى دەکەین بۆسەر ئیسرائیل

ناوەندی هەواڵ

ڕاوێژکارێکى حکومەتى عێراق ئێران وەک خێوەتى بەرخۆدان ناودەبات و هێرشەکانى مقاوەمەى ئیسلامیش وەک شانازیی بۆسەر ئیسرائیل باس دەکات.

ئاژانسى "سەدا وەسیما"ى ئێران لە زارى شێخ محەمەد سەعید نوعمانى، ڕاوێژکارى سەرۆک وەزیرانى عێراق بۆ کاروبارى فەرهەنگى بڵاویکردووەتەوە، کە کۆمارى ئیسلامى ئێرا خێوەتى بەرخۆدان و بەرگرییە و بنەماکانى لە هەمو سەنگەرەکانى بەرگرى لە لوبنان و سوریا و عێراق و یەمەن و فەلەستین دەچێنێت.

ئاماژەى بۆ ئەوەشکردووە کە شانازییەکى زۆر بە هێرشەکانى بەرەى مقاوەمە دەکەن و وتویەتى:" پێشتر فەڵەستینییەکان دژى ئیسرائیل بەرخۆدانیان دەکرد، بەڵام بەتەنها بوون و پشت و پەنایان نەبو.

ڕاوێژکارەکەى سەرۆک وەزیرانى عێراق دەڵێت، ئەمە یەکەمجارە بەرەى بەرگرى بەهێز بەناوى مقاومەوە بەرگرى لە فەلەستین و غەززە و لوبنان بکات و دەتوانن بنکەکانیان لە فڕۆکەى بێ فڕۆکەوان و موشەکى دورمەودا بپێکن.

ڕاوێژکارەکەى سودانی جەختیشیکردووەتەوە کە مقاوەمەى ئیسلامى لە عێراق ئێستا توانیویەتى هاوکێشەى نوێ و بەهێز دورست بکات لە ناوچەکە و جیهاندا و وتى، ئێستا دەتوانین هیواى زیاترمان هەبێت بۆ بەدەستهێنانى سەرکەوتن.