ئەو كەسانەی قەدەغەی هاتووچۆ لەڕۆژانی سەرژمێریی نایانگرێتەوە ئاشکرا کران

ناوەندی هەواڵ

بۆ ئەنجامدانی سەرژمێری گشتی لە عێراق ماوەی دوو ڕۆژو لە ڕۆژانی 20 و 21 ی ئەم مانگە لەسەرتاسەریی عێراق قەدەغەی هاتوچۆ رادەگەیەندرێت پێویستە هاوڵاتییان لە ماڵەکانی خۆیاندا بمێننەوە، ئەوەش بۆ ئەوەی لەکاتی سەردانیکردنی ژمێرەرەکان بۆ ماڵەکانیان بە دروستی پرۆسەی سەرژمێری بەڕێوەبچێت.

عادل عەباس، نوێنەری وەزارەتی ناوخۆ و سەرۆکی لیژنەی باڵاى ئەمنی پرۆسەى سەرژمێرى گشتى لە کۆنگرەیەکی ڕۆژنامەوانیدا ڕایگەیاند،  قەدەغەی هاتوچۆ لە سەرتاسەری عێراق لە شەوی 19 لەسەر 20ی ئەم مانگەوە دەستپێدەكات و دوو ڕۆژ دەخایەنێت.

ئاماژەی بەوەشکرد، تیمەکان لە 14ی ئەم مانگەوە کارەکانیان لە ناوچەکانی خۆیان دەستپێدەکات و هەڵدەستن بە کۆکردنەوەی زانیاری سەرتاسەری لەو ناوچانە و رێکارەکانی سەرژمێری لە 10ی مانگی داهاتو کۆتایی دێت.

میقداد میری، وتەبیژی وەزارەتی ناوخۆی عێراق لەو کۆنگرە ڕۆژنامەوانییەدا ڕایگەیاند، لەو ماوەیەدا هاتوچۆی ئۆتۆمبێل لەنێوان هەموو گوند، کۆمەڵگە، ناحیە، قەزا و پارێزگاکانی عێراق و هەرێمی کوردستاندا قەدەغەیە، تەنها لە حاڵەتێکی مرۆڤیی نەخوازراو یان حاڵەتێکی زۆر پێویست نەبێت کە ئەو کات رێگە بە هاوڵاتییان دەدرێت هاتوچۆ بکەن. 

ڕاشیگەیاند، بەپێی بڕیارەکە تەنها ڕێگە بەو  ڕۆژنامەنووسانەی کەباجیان هەیە و فەرمانبەرانی فەرمانگە خزمەتگوزارییەکان، هێزە ئەمنییەکان ئەو کەسانەی لەگەڵ تیمەکانی سەرژمێری کاردەکەن بۆیان هاتووچۆ بکەن.