وەزیری کاروباری کۆمەڵایەتی: سەرژمێری بۆ بڕینی مووچە نییە

ناوەندی هەواڵ

وەزیری کاروکاروبارى کۆمەڵایەتى عێراق ڕایگەیاند، پرۆسەى سەرژمێری بۆ دانانى پلانى پەرەپێدان و گەشەى کۆمەڵگەیە، لەڕێگەى داتا و زانیارییەکانەوە دەتوانرێت پەرە بە ستراتیجیەتى کارکردنى دەوڵەت بدرێت.

ئەحمەد ئەسەدی وەزیری کاروکاروبارى کۆمەڵایەتى عێراق بە ڕۆژنامەی مەدای وتووە، ئەرکی سەرژمێریی ئەوە نییە مووچە و هاوکاریی هاووڵاتى ببڕێت یان سیخوڕییان بەسەرەوە بکات، لەڕێگەى سەرژمێری گشتییەوە ئاستى هەژاریی و دواکەوتووى هەندێک شوێن دیاریدەکرێت و لەو ڕێگەیەوە پلانى گەشەپێدانى دادەنرێت، بەشێکى دیکەشى پەیوەندی بە باشکردنى بژێوی خێزانەکان و بەرزکردنەوەى داهاتى تاکەوە هەیە.

بڕیارە لە ڕۆژانی 20 و 21ی ئەم مانگە سەرژمێری لە تەواوی عێراق بە هەرێمی کوردستانیشەوە دەستپێبکات،بەگوێرەی ڕێنماییەکانی وەزارەتی پلاندانی عێراق پێویستە هەر ماڵێک لانی کەم کەسێکی لێبێت تا تەواوی زانیارییەکانی سەرجەم ئەندامانی خێزانەکە بدات بە بژمێرەکانی سەرژمێری.

هاوکات، بریکاری وەزارەتی پلاندانانی هەرێم، دەڵێت لە کاتی سەردانی تیمەکانی سەرژمێری 77 پرسیار لە هاووڵاتییان دەکرێت، ماوەکەشی لە نێوان 30 بۆ 35 خولەک دەبێت بۆ هەر ماڵێک.

وتەبێژى وەزارەتى گواستنەوەش ڕایگەیاندووە، لە ڕۆژانى قەدەغەى هاتوچۆدا فرۆکەخانەکان داناخرێن و بۆ ئەو مەبەستە وەزارەتى پلاندانان و گواستنەوە هەماهەنگی تەواویان کردووە.