کاروان یاروەیس: لە بودجەى 2025 پشکى هەرێم زیاد ناکات

ناوەندی هەواڵ

ئەندامێکى ئەنجومەنى نوێنەرانى عێراق رایگەیاند، هەرچەندە رێژەى دانیشتوان لە سەرژمێرى گشتیدا 14%ى عێراق تێدەپەڕینێت، بەڵام پشکى هەرێم لە بودجەدا بۆ ساڵى ئایندەش زیاد ناکرێت.

لە یاساى بودجەى 2023 و 2024 و 2025ـى عێراق، پشکى هەرێمى کوردستان بە 12.67% دیاریکراوە، بەڵام بەگوێرەى ئەنجامى بەرایى سەرژمێریى دانیشتووان، هەرێمى کوردستان 14%ى کۆى دانیشتووانى عێراق پێکدەهێنێت.

کاروان یاروەیس، ئەندامى ئەنجومەنى نوێنەرانى عێراق رایگەیاند، بۆ بودجەى ساڵى 2025 ناتوانین پشکى هەرێمى کوردستان لە 12.67% بۆ 14% زیاد بکەین، چونکە بودجەى عێراق بۆ سێ ساڵە و گۆڕانکارى لە دەقى بودجەکەدا نەکراوە.

دەشڵێت، پاش تەواوکردنى قۆناغى سێیەمى سەرژمێریى دانیشتووان و راگەیاندنى ئەنجامە فەرمییەکان، سەرژمێرییەکە دەبێتە بنەماى دیاریکردنى بودجەى 2026 و ساڵانى دواتر

بەوتەى کاروان یاروەیس لە ئێستادا حکومەتى عێراق سەرقاڵى ئامادەکردنى خشتەى بودجەى 2025ـە، گۆڕانکارى لە ژمارەکان دەکات وەکو بڕى بودجە و خەرجییەکان و دواتر رەوانەى ئەنجومەنى نوێنەرانى دەکات، بەڵام دەقى یاساکە گۆڕانکارى تێدا ناکرێت.