وەفدێك بۆ هاوتاكردنی مووچەی خاوەنپێداویستییە تایبەتەكان دەچێتە بەغداد

ناوەندی هەواڵ

شاندێكی هەرێمی كوردستان بە سەرۆكایەتیی وەزیری كار و كاروباری كۆمەڵایەتی سەردانی بەغدا دەكەن، پرسی سەرەكیش هاوتاكردنی مووچەی خاوەنپێداویستییە تایبەتەكانە.
11 ساڵە بەستنی مووچە بۆ خاوەن پێداویستییە تایبەتەكانی هەرێمی كوردستان ڕاگیراوە لەو ماوەیەدا نزیكەی 30 هەزار خاوەن پێداویستی لە وەزارەتی كار و كاروباری كۆمەڵایەتی تۆماركراون، لەو ژمارەیە نزیكەی 14 هەزاریان لیژنەیان بۆ كراوە و چاوەڕێی بەستنی مووچەكانیان دەكەن.
لە عێراق یاسای خاوەن پێداویستیی تایبەتی ژمارە 38ـی ساڵی  2013 هەموار كراوەتەوە و مووچەی خاوەن پێداویستییە تایبەتەكان لە 170 هەزار دینارەوە دەستپێدەكات بۆ 400 هەزار دینار ، بەڵام لە هەرێمی كوردستان مووچەیان 100 بۆ 150 هەزارە و تاوەكو ئێستا هاوتا نەكراوە.
لیستی تۆماری نوێی خاوەن پێداوسیتییە تایبەتەكان، كە ژمارەیان زیاتر لە 13 هەزار و 200 خاوەن پێداویستییە، هاوتاكردنی مووچەكانیان لەگەڵ ئەوانەی مووچەیان هەیە ژمارەیان دەبێتە 102 هەزار كەس.