ماكرۆن بۆ ڕۆژئاواى كوردستان: دەستبەردارى کورد نابیین

سەرۆکی فەرەنسا دڵنیایی دەداتە کوردانی ڕۆژئاوای کوردستان‌ و رایدەگەیەنێت لە سوریا دەستبەردارى کورد نابین و بەوەفا دەبین بەرامبەریان و دەشڵێت، شەڕڤانانى  کورد لە سوریا لەپێناو ى ئازادیدا شەڕیان کردوە و ڕوبەڕوى تیرۆر بونەتەوە.

ئەمڕۆ دووشەممە 6-1-2025،  ئیمانوێل ماکرۆن، سەرۆکی فەرەنسا لەپه‌یامى کۆبونەوەی ساڵانەی باڵیۆزەکانی فەرەنسا رایگەیاند، بەڵێن بێت پشت لەکوردانی سوریا نه‌کەین ‌و هاوسۆزبین لەگەڵیاندا، کوردەکان ڕووبەڕووی گروپە تیرۆریستییەکان، بەتایبەتی داعش بونەتەوە.

وتیشى، فەرەنسا لەپرۆسەی دورمەودای ڕاگوزەری سوریادا یاوەر دەبێت تا سوریایەکی ئازاد و سەروەر کە ڕێز لەفرەچەشنی نەتەوەیی‌ و سیاسی ‌و تائیفی خۆی بگرێت و  دابمەزرێنرێت.

ماکرۆن  لەبارەی شەڕڤانانی کورد لە رۆژئاوای کوردستانیش قسەی کردووە و بە "جەنگاوەرانی ئازادی" ناوی بردوون و جەختیکردەوە، کە فەرەنسا پشت لە "جەنگاوەرانی ئازادیی وەکو کورد ناکات،" کە شەڕی دژی گرووپە تووندئاژۆکان لە سووریا دەکەن.