وتەبێژی دەمپارتی: سەردانی ئیمڕاڵی دەکەینەوە

ناوەندی هەواڵ

وەفدی دەم پارتی پەیامەكەی ئۆجەلانی گەیاندە ئاك پارتی و سەعادەت و ئاییندە، ڕۆژی هەینێش دووبارە سەردانی ئیمراڵی دەکاتەوە. وتەبێژی دەمپارتیش دەڵێت، پێویستە لە تورکیادا واز لە بەکارهێنانی زمانی ڕەتکردنەوەی کورد بهێنرێت.

وەفدی دەم پارتی بە ئەندامێتی پەروین بوڵدان و سڕی سورەیا ئۆندەر و ئەحمەد تورك، دەستی بە ژمارەیەك دیدار و كۆبوونەوە لەگەڵ پارتە سیاسییەكانی توركیا كرد بۆ گەیاندنی پەیامەكەی ئۆجەلان.

ئەمڕۆ وەفدەكە سەردانی پارتی دەسەڵاتدار ئاكپارتی و پارتی سەعادەت و پارتی ئاییندەیان كرد، پێشتریش سەردانی سەرۆكی پەرلەمان و سەرۆكی مەهەپەیان كردبوو.

دوای كۆبوونەوەكە سری سورەیا ئۆندەر وتی، لە چوارچێوە كۆبوونەوەكانیاندا  سەردانی سەڵاحەدین دەمیرتاش، هاوسەرۆكی پێشووتری هەدەپە دەكەن لە زیندان و دواتر ئەنجامی دیدار و كۆبوونەوەكانیان بڵاودەكەنەوە.

هاوکات بڕیارە لە ڕۆژی 10ی ئەم مانگە دووبارە وەفدی دەم پارتی سەردانی ئیمرالی بكەنەوە.

ئایشە گول دۆغان، وتەبێژی دەم پارتی ڕایگەیاند، ئێستا دەبێت مەرجەكانی ئۆجەلان بگۆڕدرێت و هەلومەرجێك دروست بكرێت كە بەشدار بێت لەم قۆناغەدا و بیكاتە رووداوێكی مێژوویی.

وتیشی، پێویستە پەرلەمان بتوانێت بە زووترین كات ئەم ڕۆڵە بگێڕێت و دەستپێشخەری بكات بۆ چارەسەر و واز لە بەكارهێنانی زمانی رەتكردنەوە بهێنرێت بەرامبەر كورد لە توركیا.

لە دواى شکستهێنانى پرۆسەى ئاشتى لە ساڵى 2015 ئەمە یەکەم سەردانى شاندى سیاسی پارتە کوردییەکان بۆ لاى ئۆجەلان، کە نزیکەی 26 ساڵە لە دوورگەى ئیمراڵى زیندانیکراوە.

پێش سەردانی شاندەکەش لە ڕۆژی 12ی 12ی ساڵی ڕابردوو دوایین کەس سەردانى ئۆجەلانى کرد، عومەر ئۆجەلان، برازاى عەبدوڵا ئۆجەلان بوو، دواى سەردانەکە پەیامێکى ئۆجەلانى بۆ ڕایگشتى وتورکیا و کوردستان بڵاوکردەوە کە وتبووى، دەتوانم دۆخى شەڕ بگۆڕم بۆ سیاسی و یاسایی.