بوڵدان:دوای جەژن لەگەڵ ئەردۆغان کۆدەبینەوەو سەردانی ئیمراڵیش دەکەینەوە

ئیرادە میدیا

پەرلەمانتارێکی دەم پارتی دەڵێت، دوای جەژنی ڕەمەزان لەگەڵ رەجەب تەیب ئەردۆغان، سەرۆک کۆماری تورکیا کۆدەبنەوە.

پەروین بوڵدان، پەرلەمانتاری دەم پارتی ئاماژە بەوەش دەکات، بۆ سەرخستنی پرۆسەی چارەسەری، ئازادکردنی سەڵاحەدین دەمیرتاش کاریگەر دەبێت.

پەروین بوڵدان، پەرلەمانتاری دەم پارتی لە بازنەی وان و ئەندامی شاندی ئیمرالی، شەوی ڕابردوو لە بەرنامەیەکی تەلەڤیزیۆنیدا لەبارەی ئەگەری کۆبوونەوەی شاندەکەی ئیمرالی لەگەڵ ڕەجەب تەیب ئەردۆغان، سەرۆک کۆماری تورکیا وتی: ''ڕاستەوخۆ دوای جەژن لەگەڵ  ئەردۆغان کۆدەبینەوە''.

پەرلەمانتارەکەی دەم پارتی ڕاشیگەیاندووە، بۆ ئەوەی پرۆسەکە باشتر بەڕێوەبچێت، دەبێت چاکسازیی یاسایی لەبارەی زیندانییانی گرتووخانەکان بگیرێتەبەر، "بۆ نموونە، ئازادکردنی سەڵاحەدین دەمیرتاش و فیگەن یوکسەکداغ کاریگەریی ئەرێنی لەسەر پرۆسەکە دەبێت".

فیگەن یوکسەکداغ و سەڵاحەدین دەمیرتاش، هاوسەرۆکانی پێشوتری "هەدەپە" کە لە ساڵی 2016ەوە لە زیندانن، لەناو ئەو 108 ئەندام و بەرپرسەی هەدەپەدان کە لە دۆسیەی ڕووداوەکانی کۆبانێ دادگایی کران.

ئەو ئەندامەی شاندی ئیمرالی ئاماژەی بەوەش کرد، بۆ سەرخستنی پرۆسەی چارەسەری، دەبێت هەموو پارتە سیاسییەکانیش بەرپرسیارێتی لە ئەستۆ بگرن و رۆڵیان لە بەرەوپێشبردنی هەبێت.

شاندی دەم پارتیی ئیمرالی، ڕۆژی 27ی شوباتی 2025 لە ئیستەنبووڵ کۆنفرانسێکی ڕۆژنامەوانیدا بانگەوازەکەی ئۆجەلانی خوێندەوە.

ئۆجەلان لە بانگەوازەکەدا بۆ پەکەکە وتی: "کۆنگرەتان ببەستن و بڕیار بدەن. پێویستە چەک دابنێن و پەکەکە خۆی هەڵبوەشێنێتەوە".

دوو رۆژ دوای بانگەوازەکەی ئیمراڵی، پارتی کرێکارانی کوردستان (پەکەکە) بەرەبەیانی 1ی ئاداری 2025، پابەندی خۆیان بەبانگەوازەکەی ئۆجەلان ڕاگەیاند، بەڵام وتیان دەبێت ئۆجەلان خۆی سەرپەرشتی بەستنی کۆنگرە بکات.