د.موسەننا ئەمین: پارتی بەپلەی یەکەم و یەکێتیش خەمساردن لەپرسی بە پارێزگابوونی هەڵەبجەدا

ناوەندی هەواڵ

دەنگدان لەسەر پڕۆژە یاسای بەپارێزگابوونی هەڵەبجە لە کۆماری عێراقی فیدڕاڵ بڕگەی یەکەمی خشتەی کاری کۆبوونەوەی ژمارە 6 ی ئەمڕۆی پەرلەمانی عێراق دەبێت، بەڵام لەبەرامبەر ئەوەدا هێزە شیعییەكان پڕۆژە یاسای دەستەی حەشدی شەعبی یان هێناوەتە ناو خشتەی كۆبوونەوەكان بۆ ئەوەی خوێندنەوەی بۆبکرێت.

فەرمانگەی ڕاگەیاندنی پەرلەمانی عێراق بڵاویكردەوە، ئەمڕۆ چوار شەممە لە كاتژمێر 8ی شەو پەرلەمان كۆدەبێتەوە و خشتەی كار لە 7 بڕگە پێكهاتووە.

بەپێی خشتەی كاری كۆبوونەوەی پەرلەمان، یەكەم بڕگە بۆ دەنگدان بە پڕۆژە یاسای بە پارێگابوونی هەڵەبجە تەرخان كراوە.

هەر بەپێی خشتەكە، لە بڕگەی چوارەمدا پڕۆژە یاسای "دەستەی حەشدی شەعبی" دانراوە.

د.موسەننا ئەمین، ئەندامی پەرلەمانی عێراق بە دەزگای میدیایی ئیرادەی وت،هەندێک کەس و لایەنی عێراقی و شیعی  دەیانەوێت دەنگدان بە پارێزگای هەڵەبجە بەرامبەر بێت بە بە دەنگدان بە یاسای حەشدی شەعبی، بەڵام تائێستا ئەو هەنگاوە نەبووە بەمەرج لەبەر ئەوەی یاسای حەشدی شەعبی خوێندنەوەی دووەمی بۆ نەکراوە.

وتیشی، ئەوەی کە تا ئێستا نەکراوە بەمەج لەبەر ئەوەیە یاسای حەشدی شەعبی ئامادە نیە، بەڵام هەندێک کەس و لایەنی نزیکیان  باسی دەکەن و دەیانەوێت ئەو هەنگاوە بکەن بەمەرج و ئەو ئیرادەیەشیان تێدا دەبینرێت، بەڵام نەبووە بەبڕیار تەنها مساومەی پێدەکەن و کورد نەچووەتە ژێر ئەو بارەوە.

ئاشکراشیکرد، هەندێک بەربەست هەیە بۆ ئەوەی  دەنگدان لەسەر پارێزگای هەڵەبجە لە پەرلەمانی عێراق دوا بخرێت تا پڕۆژە یاسای دەستەی حەشدی شەعبی کە تەنها خوێندنەوەی یەکەمی بۆ کراوە، خوێندنەوەی دووەمیشی بۆ بکرێت و بگاتە قۆناعی دەنگدان دواتر هەردوو پرۆژەکە بەرامبەر بەیەک دەنگیان لەسەر بدریت.

باسی لەوەشکرد، دەنگدان لەسەر پڕۆژە یاسای بەپارێزگابوونی هەڵەبجە هەنگاوە قورسەکەی بڕیوەو خوێندنەوەی بۆکراوە، ئەگەر ئەمشەو ڕێژەی یاسایی ئەندامانی پەرلەمان لەناو هۆڵی کۆبوونەوە ئامادە بن ئومێد هەیە پڕۆژە یاساکە دەنگی پێویست بهێنێت و تێپەڕێت.

بە پێی وتەکانی د.موسەننا ئەمین، ئەندامی فراکسیۆنی یەکگرتوو لە پەرلەمانی عێراق، بەئاشکراخەمساردی پارتی و یەکێتی دەبینرێت بۆ پشتیوانی دەنگدان لەسەرپڕۆژەیاسای بە پارێزگابوونی هەڵەبجە لە پەرلەمانی عێراق،ڕەنگە ئەوەش بگەڕێتەوە بۆ ئەوەی پارتی حەزنەکات پارێزگایەکی دیکە لەسنوری دەسەڵاتی یەکێتی زیاد ببێت وپێویستە پارتی ئەو گومانە لەخۆی دووربخاتەوە بەڵگەش بۆ ئەوە ئاشکرایە کە هەردوو حزب لەکوردستان و لەعێراقیش کەمتەرخەمن و هەردوولایان بێ پلانن.

ئەندامەکەی پەرلەمانی عێراق وتیشی، پارتی بەپلەی یەکەم و یەکێتیش دڵگەرمی پێویستیان نییە بۆ دەنگدان بە پڕۆژە یاسای بە پارێزگابوونی هەڵەبجە و نەیان خستتووەتە ناو پڕۆژەو ئەولەویانی کاری خۆیان و شەڕی پێویستی بۆ ناکەن ئەوەش واتای ئەوە دەگەیەنێت کە دژن یان کەمتەرخەمن، ئەگەر بڵێین دژن یان کەمتەر خەمن ئەوە ڕوونەو سیاسەتیان لەبەڕێوەبردنی کوردستان ئەوە دەردەخات، بەڵام هەردوولایان لەکوردستان و لەبەغداش بێ پلانن.

د.موسەننا ئەمین،گلەیشی لەهەڵوێستی لایەنەکوردییەکان کردو ڕایگەیاند،کاتێک لایەنە عێراقییەکان کارێکی گرنگیان دەبێت هەموویان دێنە بینای پەرلەمان وهانی پەرلەمانتارەکانیان دەدەن تا پڕۆژەیاساکانی خۆیان تێدەپەڕێت بەڵام کورد لەفەوزایەکدایەو ئەو هەموو وەزیرو نوێنەرەی هەیە لەبەغدا ناتوانێت سوود لەتواناکانی خۆی وەربگرێت و سەرکردەکانی کورد لەسەر خەت نین تا ژوورێکی عەمەلیاتمان هەبێت و سەرپەرشتی پرسەگرنگەکانی تێدا بکرێت، ئەوەش بووەتە گرفتی گەورە بۆ کاری پەرلەمانتارەکوردەکان.

ئاماژەی بەوەشکرد، دوێنێ هیچ کۆبوونەوەیەکی فراکسیۆنە کوردستانییەکان نەبوو بۆ ئەوەی کە لە دەنگدان لەسەر پڕۆژە یاسای بەپارێزگابوونی هەڵەبجە سەرکەوتووبن وەک ئەوەشی کە بینرا سەرکەوتوو نەبووین، ئەمڕۆش هیچ هەنگاوێک نەنراوە بەڵام  بڕیارە کاتژمێر(8)ی شەو جێگری سەرۆکی پەرلەمان لەپشکی کورد هەندێک قسەمان لەگەڵ بکات، ئەوەش پیی ناوترێت کوبوونەوەو ژووری عەمەلیات.

پرسی دەنگدان  لەسەر پڕۆژە یاسای بەپارێزگابوونی هەڵەبجە لە کاتێکدایە لە ماوەی ڕابردوودا بەرامبەر بە دەنگدان بە پڕۆژە یاسای گێڕانەوەی ماڵ و موڵك لە ناوچە كوردستانییەكان "بۆ كورد"پڕۆژە یاسای باری كەسێتی "بۆ شیعە" دانرا و دەنگیان لەسەر درا.