هەپەگە: خستنەخوارەوەی درۆنەکەی بنگردی گرتە ئەستۆ

ناوەندی هەواڵ

هەپەگە بەفەرمی بەرپرسیارێتی خستنەخوارەوەی درۆنەکەی بنگردی گرتە ئەستۆ و دەڵێت” بۆ مەبەستی بەرگری لەخۆمان خستمانە خوارەوە”.

هێزەکانی پاراستنی گەل "هەپەگە"، کە باڵی سەربازی پەکەکەیە، لە بڵاوکراوەیەکدا بەرپرسیاریتی خستنەخوارەوەی درۆنە تورکییەکەی ناوچەی بنگردیان لەئەستۆگرت کە درۆنێکی جۆری ئاکنجی تورکی بوو.

بەپێی ڕاگەیەندراوەکەی هەپەگە، لەو کاتەوەی ئاگربەست ڕاگەیانراوە، سوپای تورکیا هەشت جار هێرشی بەچەکی قەدەغەکراو، و 93 جار هێرشی ئاسمانی ئەنجامداوە، و بەردەوامە لە هێرشەکان.

هەپەگە هۆشداریشی بە تورکیادا و دەڵێت"ئەگەر تورکیا بەزوترین کات هێرشەکانی ڕانەگرێت، ئەو بەردەوام دەبین لە خستنەخوارەوەی درۆنەکان".

هەپەگە لەڕاگەتەندراوەکەیدا دەڵێت، مافی خۆمانە بۆ مەبەستی بەرگری ئەم جۆرە فڕۆکە هەواڵگرییانە بخەینە خوارەوە.

بۆ جاری سێیەمە فڕۆکەی بێ فڕۆکەوانی ئاکنجی تورکی لەلایەن هێزەکانی گەریلاوە تێکدەشکێنرێت،ئەوەش لەکاتێکدایە، تورکیا پێی وابوو ئەو درۆنە ناخرێتەخوارەوە.