جەمیل بایک: کەس ناتوانێت بەبێ رێبەر ئاپۆ کۆنگرە ببەستێت

ئیرادە میدیا

هاوسەرۆکی دەستەی بەڕێوەبەری کەجەکە ڕایگەیاند، بۆ ئەوەی پرۆسەی چارەسەری بەرەوپێش بچێت، دەبێت هەلومەرجی ئازادیی کارکردن بۆ ئۆجەلان بڕەخسێندرێت، دەشڵێت، ''جگە لە ڕێبەر ئاپۆ، کەس ناتوانێت کۆنگرە ببەستێت''.
 
جەمیل بایک، هاوسەرۆکی دەستەی بەڕێوەبەری کۆما جڤاکێن کوردستان (کەجەکە) ڕۆژی دووشەممە، 17ی ئاداری 2025 لە هەڤپەیڤینێکدا رایگەیاند، بۆ سەرخستنی پرۆسەی چارەسەری، دەبێت هەلومەرجی ئازادیی کارکردن بۆ ئۆجەلان بڕەخسێندرێت.
 
هاوسەرۆکی کەجەکە پێیوایە، ئەو هەلەی بۆ پرۆسەی چارەسەری هاتووەوە پێشەوە، نابێت بە فیڕۆ بدرێت، دەشڵێت، ''پێویستە هەمووان بە زیادەوە ئەرکەکانی خۆیان جێبەجێ بکەن''
 
بایک ئاماژەی بەوە کرد، بۆ جێبەجێکردنی بانگەوازەکەی ئۆجەلان و بەستنی کۆنگرە لەلایەن پەکەکە، دەبێت هێرشەکانی سوپای تورکیا بۆ سەر پێگەکانیان لە هەرێمی کوردستان بوەستێندرێن.
 
هاوسەرۆکی دەستەی بەڕێوەبەری کەجەکە لەبارەی بەستنی کۆنگرەی پەکەکە جەختدەکاتەوە کە: ''دەبێت هەمووان ئەمە بزانن، جگە لە ڕێبەر ئاپۆ، ھیچ کەس ناتوانێت کۆنگرە ببەستێت. چونکە ئەو کەسەی ئەم بزووتنەوەیەی دامەزراند و گەشەی پێدا، ڕێبەر ئاپۆ بوو، نە بەڕێوەبەرایەتی پەکەکە و نە کادیرانی پەکەکە ناتوانن ئەمە بکەن''.
 
عەبدوڵڵا ئۆجەلان، ڕێبەری زیندانیکراوی کوردو پەکەکە ڕۆژی 27ی شوباتی 2025 لە بانگەوازەکەیدا بۆ پەکەکە وتی: "کۆنگرەتان ببەستن و بڕیار بدەن. پێویستە چەک دابنێن و پەکەکە خۆی هەڵبوەشێنێتەوە."
 
دوو رۆژ دواتر، پارتی کرێکارانی کوردستان (پەکەکە) رایگەیاند، پابەندی بانگەوازەکەی ئۆجەلان دەبن، بەڵام دەبێت ئۆجەلان خۆی سەرپەرشتی کۆنگرەکە بکات