'ئەو کۆنگرەیەی عەبدوڵڵا ئۆجەلانی تێدا ئامادەنەبێت، ئێمه‌ چه‌ك دانانێین'

ئیرادە میدیا

دوای په‌یامه‌كه‌ی ئۆجه‌لان‌و وه‌ڵامدانه‌وه‌ی له‌لایه‌ن په‌كه‌كه‌وه‌، ئێستا قه‌ندیل په‌یامی نوێی هه‌یه‌، سه‌ركرده‌یه‌كی دیاریی پارتی كرێكارانی كوردستان (په‌كه‌كه‌)ش ده‌ڵێت:"ئەو کۆنگرەیەی عەبدوڵڵا ئۆجەلانی تێدا ئامادەنەبێت، ئێمه‌ چه‌ك دانانێین".

دوران کاڵکان ئەندامی کۆمیتەی بەڕێوەبەریی پارتی کرێکارانی کوردستان ڕایگەیاندوە، "ئێمه‌ وه‌ك په‌كه‌كه‌ بڕیارێكی نوێ‌و به‌په‌له‌مان هه‌یه‌، ئه‌ویش ئه‌وه‌یه‌، ئەو کۆنگرەیەی عەبدوڵڵا ئۆجەلانی تێدا ئامادە نەبێت وه‌كو كۆنگره‌ی په‌كه‌كه‌، ئه‌وا په‌كه‌كه‌ ناتوانێت بڕیاری چەکدانان بدات، بۆیه‌ جه‌ختده‌كه‌ینه‌وه‌ تاکە کەس کە بتوانێت ئەمە بکات ئۆجەلانەو تەنها ئەو دەتوانێت ئەو بڕیارە بۆ پەکەکە بدات".

دەشڵێت: "ئەم نەورۆزە، نەورۆزی ئازادی ئۆجەلان دەبێت‌و هەموان دەیانەوێت هەلومەرجی ژیان‌و کاری ئازادی بۆ ئۆجەلان بڕەخسێت‌و لەبەرامبەردا ئەشکەنجەو گۆشەگیریی ئیمراڵی هەڵبوەشێتەوە، بەهیواین نەورۆزی ئەمساڵ ببێتە نەورۆزی ئازادیی ئۆجەلان‌و تورکیاو ڕۆژهەڵاتی ناوەڕاستیش دیموکرات بێت".

هاوکات:"داوا لەهاوڵاتییانی باکوری کوردستان، گەلانی تورکیاو ڕۆژهەڵاتی ناوەڕاست دەکات، بەلێشاو ڕوبکەنە گۆڕەپانەکانی نەورۆزو بەجۆش‌و خرۆشەوە نەورۆز پیرۆز بکەن، لەهەمانکاتدا بەدەنگێکی بەرز داوای ئازادی ئۆجەلان بکەن".