کوردانی ڕۆژهەڵات دووجار ڕووبەرووی گەمارۆی ئابوری دەبنەوە

رۆژی ( 20 )ی ئەم مانگە گەنجێکی دیکەی کۆڵبەر بە تەقەی ڕاستەوخۆی هێزەکانی رژێمی کۆماری ئیسلامی ئێران کوژرا، کۆڵبەرەکە کوژراوەکە ناوی سینا ڕۆستەمیە و خێزاندار و خاوەن منداڵێکە ، ئەو لەبەرزاییەکانی بانە کوژرا .
ڕێكخراوی هه‌نگاو بۆ مافی مرۆڤ دەڵێت: سینا ڕۆستەم پوور لە ناوچەی سنووریی "سوورکێو"ی بانە و بە تەقەی ڕاستەوخۆی ئەو هێزانە دەستبەجێ گیانی لەدەست دا .

بەدواداچوونە میدیاییەکانی نێو ڕۆژهەڵاتی کوردستان، ئەوە پشت ڕاست دەکەنەوە کە خه‌ڵكی كوردی ناوچه‌ سنوورییه‌كانی نێوان كوردستانی باشور و ڕۆژهه‌ڵات به‌هۆی بێكاری و هه‌ژارییه‌وه‌ په‌نا ده‌به‌نه‌ به‌ر كاری كۆڵبه‌ری و گواستنه‌وه‌ی شتومه‌ك له‌ناوچه‌ سنوورییه‌كانه‌وه‌، به‌ڵام به‌ بیانووی ئه‌وه‌ی كارێكی نایاساییه‌ و هه‌روه‌ها به‌ بیانووی پاراستنی سنووره‌كان له‌ هاتوچۆی هێزه‌ كوردییه‌ ئۆپۆزیسیۆنه‌كانی كۆماری ئیسلامی ئێران، زۆربه‌ی جار ئه‌و كۆڵبه‌رانه‌ ڕووبه‌ڕووی كوشتن و برینداربوون و گرتن ده‌بنه‌وه‌، په‌نابردنی ئێران بۆ توندوتیژی تا دوا ئه‌ندازه‌ ڕووبه‌ڕووی ڕه‌خنه‌ی ڕێكخراوه‌كانی مافی مرۆڤی نێوخۆیی و نێوده‌وڵه‌تی بۆته‌وه‌ .

 خراپی گوزه‌رانی هاوڵاتیانی ناوچه‌ سنوورییه‌كانی ڕۆژهه‌ڵات و نه‌بوونی كار و پشتگوێخستنی سه‌رجه‌م شاره‌ كوردستانییه‌كانی ئێران له‌ لایه‌ن كۆماری ئیسلامییه‌وه‌ بۆته‌ هۆی ئه‌وه‌ی خه‌ڵكی ئه‌و ناوچانه‌ بۆ په‌یداكردنی بژێوی ژیانیان ڕوو له‌ كۆڵبه‌ری بكه‌ن .
بە پێی لێدوانی هاوڵاتیانی کورد لە ناوچە کوردییەکان، حكومه‌تی ئێرانی به‌ ئه‌نقه‌ست پرۆژه‌ی ئابووری له‌ ڕۆژهه‌ڵاتی كوردستاندا پشتگوێی خستووه‌، هاوڵاتیان پێیان وایە ئێستا ناوچە کوردییەکان لە یەک کاتدا دووجار ڕووبەڕووی ئابڵوقەی ئابوری بوونەتەوە، یەکێک ئابڵوقەی نێودەوڵەتی و یەکێکی دیکەش ئابڵوقەی ڕژێمی ئێران خۆی .

مه‌سعود پزشكیان کە ئێستا سەرۆک کۆمارە، له‌چوارچێوه‌ی هه‌ڵمه‌ته‌كانی هه‌ڵبژاردندا له‌‌ حوزه‌یرانی ( 2024 )دا له‌ شاری سنه‌ ڕایگه‌یاند : شتێكی شەرمهێنەرە‌ كه‌ گه‌نجه‌كانیان په‌نا وه‌به‌ر كاری كۆڵبه‌ری ببه‌ن له‌ پێناوی پاروه‌ نانێكدا، پێویسته‌ سنوورێك دابمه‌زرێنین كه‌ بازرگانی فه‌راهه‌م بكات نه‌ك كۆڵبه‌ری"، به‌ڵام هه‌ر دوای پێنج ڕۆژ له‌ هه‌ڵبژاردنی پزشكیان وه‌ك سه‌رۆك كۆماری ئێران پێنج كۆڵبه‌ر له‌ نه‌وسودی سه‌ر به‌ پارێزگای كرمانشان ڕووبه‌ڕووی ته‌قه‌ی ڕاسته‌وخۆی هێزه‌ ئه‌منییه‌كانی ئێران بوونه‌وه‌ و یه‌كێكیان كوژرا.

ڕێكخراوی "هانا" بۆ مافی مرۆڤ كه‌ ڕێكخراوێكی كوردی تایبه‌تمه‌نده‌ به‌ چاودێریكردنی مافه‌كانی مرۆڤ پێشتر ڕایگه‌یاندبوو: ته‌نیا له‌ ساڵی ( 2024 )دا، ( 59 ) كۆلبه‌ر به‌ ته‌قه‌ی هێزه‌ ئه‌منییه‌كانی ئێران و به‌ ڕووداوی سروشتی له‌ سه‌ر سنووره‌كان کوژراون و گیانیان له‌ده‌ست داوه‌. له‌و ژماره‌یه‌ ( 50 ) كۆڵبه‌ر به‌ ته‌قه‌ی ڕاسته‌وخۆی هێزه‌ سنوورپارێزه‌كانی ئێران كوژراون، ( 9 ) كۆڵبه‌ریش به‌هۆی داڕوخانی به‌فر و ڕووداوه‌كانی هاتووچۆ گیانیان له‌ده‌ست داوه‌ .

ڕێکخراوەکە دەڵێت : ( 271 ) كۆڵبه‌ر لەهەمان ساڵدا بریندار بوون،  ( 216 ) له‌و كۆڵبه‌رانه‌ به‌ ته‌قه‌ی ڕاسته‌وخۆی چه‌كداره‌كانی ڕژێمی ئێران، و ( 18 ) كۆڵبه‌ریش به‌هۆی ئه‌شكه‌نجه‌دانیان له‌ لایه‌ن هێزه‌ چه‌كداره‌كان و ( 37 ) كۆڵبه‌ریش به‌هۆی كاره‌ساته‌ سروشتییه‌كان و ته‌قینه‌وه‌ی مین و ڕووداوه‌كانی هاتوچۆوه‌ بریندار بوون.
سه‌رجه‌می ڕووداوه‌كان له‌ ناوچه‌كانی پاوه‌ و سه‌قز و بانه‌ و مه‌ریوان و جوانڕۆ و سه‌رده‌شت و سه‌لاسی باوه‌جانی ڕوویداوه‌ .