مەلا بەختیار بۆ د. لەتیف: سەرۆکایەتییەکەت هێندەی نەماوە پێمباشه‌ هه‌ڵوێستێكی مێژوویی ده‌رببڕیت

ناوەندی هەواڵ

مەلا بەختیار داوا لە د. لەتیف ڕەشید سەرۆک کۆماری عێراق  دەکات لەو چەند مانگەی لە سەرۆکایەتی کۆماردا ماویەتی له‌سه‌ر ماده‌ی (140) و مافه‌ ده‌ستورییه‌كانی هه‌رێم و ناوچه‌ كێشه‌ له‌سه‌ره‌كان هه‌ڵوێستێكی مێژوویی ده‌رببڕێت.

ئه‌مڕۆ دووشەممە24ی ئازاری 2025، د. له‌تیف ڕه‌شید، سه‌رۆك كۆماری عێراق سەردانی مه‌لا به‌ختیاری كرد و لە دیدارەکەدا سه‌رۆك كۆمار بۆچونی خۆی له‌سه‌ر دۆخی عێراق، ناوچه‌كه‌ و كێشه‌ و مه‌ترسییه‌كان، ڕوونكرده‌وه‌و جه‌ختیكرده‌وه،‌ كه:‌ دۆخی ئه‌منی عێراق باشه‌، تیرۆر نه‌ماوه‌، مووچە‌ و خزمه‌تگوزاری به‌رده‌وامه‌، عێراق خۆی بۆ هه‌ڵبژاردن ئاماده‌ ده‌كات، نێوان عێراق و وڵاتان باشتر بووه‌.

وتیشی: "عێراق هه‌وڵده‌دات خۆی له‌ هه‌ر ئه‌گه‌رێكی مه‌ترسیدار دوور ڕابگرێت و هه‌زاران به‌ندیی ڕاگیراوی ئازاد كردووه".

هەر لەو دیدارەدا مه‌لا به‌ختیار ڕایگەیاند، دۆخی ڕۆژهه‌ڵاتی ناوه‌ڕاست به‌ره‌و گۆڕانكاری هه‌مه‌لایه‌نه‌ ده‌ڕوات. هه‌تا ئامانجه‌كانی ئه‌م گۆڕانكارییه‌ نه‌یه‌ته‌دی، ئه‌مریكا و دۆسته‌كانی، ئه‌م هه‌له‌ مێژووییه‌ی دوای لێدانی حه‌ماس و حزبوڵڵا و ڕوخانی به‌شار ئه‌سه‌د، له‌ده‌ست ناده‌ن و ده‌سته‌به‌ری به‌رژه‌وه‌ندی ئابوریی و ئاساییشی خۆیان ده‌كه‌ن.

وتیشی: "زۆر گرنگه‌ عێراق، له‌ سیاسه‌تی نوێی ئه‌مریكا و سه‌رۆك ترەمپ، قوڵبێته‌وه‌. ده‌بێت له‌ هه‌موو سێكته‌ره‌كانی ئابوریی و ئه‌منی، عێراق په‌یوه‌ندیه‌كی تایبه‌تی له‌گه‌ڵ ئه‌مریكادا هه‌بێت، چونكه‌ به‌م دۆخه‌ی نه‌بوونی یه‌ك سوپا و یه‌ك ناوه‌ندی سیاسی له‌عێراقدا، به‌رگه‌ی جه‌زره‌به‌ لێدان ناگرێ. وڵاتێكی وه‌كو ئیمارات، كه‌ هیچ كێشه‌یه‌كی نییه‌ و مه‌ترسیشی له‌سه‌ر نییه‌، كه‌چی تریلیۆنێك و چوارسه‌د ملیار دۆلار، په‌یوه‌ندی بازرگانی له‌گه‌ڵ ئه‌مریكا ده‌به‌ستێ. ده‌بێت عێراق باشتر له‌م دۆخه‌، بچێته‌ پێشه‌وه".

مەلا بەختیار ڕاشیگەیاند، گۆڕانكارییه‌كانی ناوچه‌كه‌، خۆشبه‌ختانه‌، یه‌كه‌مینجاره‌ كاریگه‌ری ئه‌رێنیی له‌سه‌ر به‌شه‌كانی كوردستان هه‌یه‌. له‌دوای په‌یمانی سیڤه‌ر و داگیركردنی كوه‌یت، كه‌ كوردستانی عێراق بوو به‌ به‌شێك له‌ هاوكێشه‌ سیاسیه‌كانی عێراق و ناوچه‌كه‌، له‌دوای ڕوخانی به‌شار و هاتنه‌ سه‌ر كاری ترامپ، فراوانترین ده‌رفه‌وت هاتۆته‌پێشه‌وه‌ بۆ چاره‌سه‌ركردنی سیاسیانه‌ی كێشه‌ی كورد له‌ به‌شه‌كانی كوردستاندا.

وتیشی: "گفتوگۆ له‌گه‌ڵ به‌ڕێز ئۆجه‌لان و ڕێكه‌وتنی ئه‌حمه‌د شه‌رع و مه‌زڵوم عه‌بدی، له‌ نمونه‌ دیاره‌كانن. بۆیه‌ هه‌قوایه‌ عێراق خوێندنه‌وه‌یه‌كی باشی بۆ ئه‌م گۆڕانكارییانه‌ هه‌بێت و پشتیوانی چاره‌سه‌ری دیموكراسیانه‌ی كێشه‌ی كورد بكات. به‌تایبه‌تی عێراق هه‌ڵوێستی خراپی به‌رامبه‌ر كورد له‌ به‌شه‌كانی كوردستان نه‌بووه".

مەلا بەختیار له‌سه‌ر مه‌سه‌له‌ی ماوه‌ی سه‌رۆك كۆماریی، وتی، چه‌ند مانگێكی تر هه‌ڵبژاردن ده‌كرێت، ڕیزبه‌ندی سیاسی و حوكمڕانی له‌عێراقدا گۆڕانكاری به‌سه‌ردا دێت، چۆن له‌سه‌ر مووچە‌ی خه‌ڵك سكاڵات گه‌یانده‌ دادگای فیدراڵی، به‌هه‌مانشێوه‌ له‌سه‌ر ماده‌ی (140) و مافه‌ ده‌ستورییه‌كانی هه‌رێم و ناوچه‌ كێشه‌ له‌سه‌ره‌كان، پێمباشه‌ هه‌ڵوێستێكی مێژوویی ده‌رببڕیت، چونكه‌ له‌دوائه‌نجامدا، جگه‌ له‌ ئه‌ركه‌ گشتییه‌كانی سه‌رۆك كۆماریی له‌سه‌ر ئاستی عێراق، زۆرترین سه‌ربه‌رزی له‌ناو نه‌ته‌وه‌كه‌ی خۆمان، بۆ سه‌رۆك كۆمار و كاربه‌ده‌ستانی تری كورد له‌ به‌غداد ده‌مێنێته‌وه‌، ئه‌گه‌ر بتوانن مافه‌ بنچینه‌یی و ده‌ستورییه‌كانی كوردستان، به‌دیبهێنن.

بە پێی ڕاگەیەندراوەکەی مەلا بەختیار، د. لەتیف ڕەشید دەربارەی بۆچوونەکانی مەلا بەختیار سەرۆک کۆمار وتوویەتی: "ئه‌وپه‌ڕی هه‌وڵده‌ده‌م".