کەی خشتەی مووچە ڕادەگەیەنرێت؟

بەپێی ڕاگەیەندراوی وەزارەتی دارایی و ئابوری هەرێم ڕێکارەکانی ناردنی تەموویلی مووچەی هەرێم كۆتایی هات و سبەینێ‌ عێراق بڕی زیاتر لە 954 ملیار دینار بۆ مووچەی مانگی 3ی مووچەخۆرانی هەرێم ڕەوانە دەكات و دواتر دەست بە دابەشكردنی مووچە دەكرێت.

میدیاكانی پارتی لە زاری سەرچاوەیەكی وەزارەتی دارایی هەرێمەوە بڵاویانكردەوە، ئەگەر سبەی چوار شەممە پارەی تەواوی مووچە بخرێتە سەر هەژماری بانكی هەرێم، دەستبەجێ خشتەی مووچە بڵاودەكەنەوە و مووچەی سەرجەم مووچەخۆران دابەش دەكرێت.

بەپێی سەرچاوەکە، لەماوەی سێ ڕۆژدا واتە ڕۆژانی (پێنج شەممە و هەینی و شەممە) سەرجەم فەرمانبەران مووچە وەردەگرن.

دوانیوەڕۆی ئەمڕۆ سێشەممە25ی ئازاری 2025، وەزارەتی دارایی و ئابوری هەرێم بڵاویكردەوە، سەرجەم ڕێکارەکانی ناردنی تەموویلی مووچە کە بڕەکەی زیاتر لە 954 ملیار و 880 ملیۆن دینارە وەک تەموویلی مووچەی مانگی 3ی مووچەخۆران و فەرمانبەران و خانەنشینانی هەرێمی کوردستان، لەلایەن وەزارەتی دارایی حکومەتی فیدراڵەوە تەواو کرا.

بەگوێرەی ڕاگەیەندراوەکەی دارایی، بڕیارە سبەی پارەکە بخرێتە سەر هەژماری بانکیی وەزارەتی دارایی و ئابووریی هەرێمی کوردستان لە لقی هەولێری بانکی ناوەندیی عێراق.