نۆیەمین دیداری سلێمانی بەڕێوەدەچێت

ناوەندی هەواڵ

ئەمڕۆ نۆیەمین دیداری  سلێمانی بەڕێوەدەچێت و بەشێکی زۆری سەرکردە و بەرپرسانى ناوخۆیی و نێودەوڵەتى بەشدار دەبن و وتەکانیان پێشکەش دەکەن.

رۆژانی 16 و 17ی نیسانی 2025 نۆیەمین “دیداری سلێمانی” لە زانکۆی ئەمریکی لە سلێمانی بەرێوەدەچێت و تیایدا گرنگترین ئاڵنگاریی گۆڕانکارییەکانی عێراق و ناوچەکە و جیهان تاوتوێدەکرێت و بابەتی سەرەکی دیدارەکەی ئەمساڵیش “ئاشتیی ناوچەکەیە.”

دیداری سلێمانی، میوانداریی سەركردە و بیرمەند و بڕیاربەدەستانی سیاسی لە رۆژهەڵاتی ناوەڕاست، ئەوروپا، ئەمریكا و هەموو جیهان دەكات، کە سەرۆكی وڵاتان، دیپلۆماتكاران، لێپرسراوانی باڵا، ئەكادیمی و شیكەرەوەی دامەزراوە سیاسی و هزرییە پێشەنگەكان بەشداریی تیادا دەكەن.

دیداری سلێمانی بۆ ئەمساڵ بە هەماهەنگی لەگەڵ دامەزراوە نێودەوڵەتییە دیارەكاندا دەبەسترێت، لە نێویاندا؛ چاتم هاوس، پەیمانگای ئیتاڵی بۆ كاروباری نێودەوڵەتی (IAI)، پەیمانگای عیسام فارس لە زانکۆی ئەمریکیی بەیروت، دامەزراوەی سەدە و گروپی قەیرانی نێودەوڵەتی.

لەدیدارەکەدا هەریەک محەمەد شیاع سودانی، سەرۆکوەزیرانی عێراق و چەند وەزیرێکی حکومەتی عێراق و مەسرور بارزانی، سەرۆکی حکومەت و چەند وەزیرێکی حکومەتی هەرێمی کوردستان ئامادەبن.

هەر بەپێی بەرنامەی کاری دیداری سلێمانی، قوباد تاڵەبانی، جێگری سەرۆکی حکومەتی هەرێم، بافڵ تاڵەبانی، سەرۆکی یەکێتی نیشتمانی کوردستان، عەمار حەکیم، سەرۆکی رەوتی حیکمە، محەمەد حەسان، نوێنەری نەتەوەیەکگرتووەکان، هۆشیار زێباری، ئەندامی دەستەی کارگێڕیی مەکتەبی سیاسیی پارتی دیموکراتی کوردستان و دکتۆر بەرهەم ساڵح، دامەزرێنەری زانکۆی ئەمریکیی سلێمانی، ئامادەبن.