یەكێتی و پارتی بۆ دابەشکردنی پۆستەکانی کابینەی نوێ كۆدەبنەوە

ناوەندی هەواڵ

بڕیاره‌ ئه‌مڕۆ سێشەممە، 15ی نیسانی2025، هه‌ردو شاندی یه‌كێتی و پارتی كۆبونه‌وه‌یه‌كی دیكه‌ تایبه‌ت به‌ پێكهێنانی كابینه‌ی ده‌یه‌می حكومه‌تی هه‌رێم له‌ پیرمام ئه‌نجامبده‌ن و تاوتوێی هه‌نگاوه‌ كۆتاییه‌كانی پێكهێنانی كابینه‌كه‌ بكه‌ن.

به‌گوێره‌ی زانیاریه‌كانی میدیای "ئیرادە"، ئه‌مڕۆ جارێكی دیكه‌ شاندی باڵای یه‌كێتی و پارتی كۆده‌بنه‌وه‌ و كۆبونه‌وه‌كه‌ش له‌ مه‌كته‌بی سیاسی پارتی له‌ پیرمام ده‌بێت و تاوتوێی دواین هه‌نگاوه‌كانی پێكهێنانی كابینه‌ی ده‌یه‌م ده‌كرێت.

دوای گفتوگۆكردن له‌سه‌ر هێڵه‌ گشتیه‌كانی كابینه‌ی نوێی حكومه‌تی هه‌رێم، چاوه‌ڕوانده‌كرێت له‌كۆبونه‌وه‌كه‌ی ئه‌مڕۆی نێوان یه‌كێتی و پارتیدا، باس له‌ شێوازی دابەشکردنی پشكه‌كانی هه‌ردولا له‌حكومه‌ت بكرێت.

پێشتر، دڵشاد شه‌هاب ئه‌ندامی شاندی دانوستانكاری پارتی رایگه‌یاند، له‌كۆبونه‌وه‌كه‌دا ده‌توانین هه‌نگاوێكی دیكه‌ بنێین و له‌ پێكهێنانی كابینه‌ی نوێی حكومه‌ت نزیكده‌بینه‌وه‌ و زۆر نزیكین له‌ گه‌یشتن به‌ رێكه‌وتن.