پارتى هێرشێكى توند ده‌كاته‌سه‌ر عێراق

ناوەندی هەواڵ

ئەندامێکی دەستەی کارگێڕی مەکتەبی سیاسی پارتی هێرشێكى توند ده‌كاته‌سه‌ر حكومه‌تى عێراق‌و به‌وڵاتى بێ یاساو دادگا ناوى ده‌بات‌و ده‌ڵێت، "عێراق پێویستی بەیاساو دادگا هەیە بۆ کۆنتڕۆڵکردنی میلیشیاو لەیاسا دەرچوه‌كان".

هۆشیار زێباری ئەندامی دەستەی کارگێڕی مەکتەبی سیاسی پارتی لەچاوپێکەوتنێکدا لەگەڵ ڕۆژنامەی (ناشناڵ) وتى، "عێراق دەرفەتێکی زێڕینی لەبەردەمدایە بۆ ئەوەی هەنگاو بەرەو پێشەوە بنێت، ئێستا دۆخی ئەمنی لەتەواوی عێراق باشترەو هێرشی تیرۆریستی کەمتر بوەتەوە، بۆیە دەتوانێت وەبەرهێنەری بیانی ڕابکێشێت".

به‌وته‌ى زێباری، "دۆخی عێراق هاندەر بوە بۆ کۆمپانیاکانی ئەمریکا بەتایبەتی لەبواری نەوت، بێنە عێراق‌و وەبەرهێنان بکەن".

به‌رپرسه‌ باڵاكه‌ى پارتى ئاماژه‌ى به‌وه‌شكردوه‌، "سەبارەت بەهێرشە درۆنییەکانی سەر هەرێمیش، حکومەتی عێراق نیازێکی پاکی هەیەو لێکۆڵینەوەی کردوە، بەڵام دوای تەواوبونی لێکۆڵینەوەکان، بکەرانی هێرشە درۆنییەکانی ئاشکرانەکردوە".

ئه‌وه‌شى وتوه‌، "عێراق لەهەموو شتێک زیاتر، پێویستی بەژینگەیەکی باش‌و ئارام هەیە بۆ وەبەرهێنەران، هەروەها پێویستی بەیاساو دادگا هەیە بۆ کۆنتڕۆڵکردنی میلیشیاو لەیاسا دەرچوەکان".