بكوژه‌كه‌ى مه‌شهه‌دانى چه‌ندى وه‌رگرتبوو؟

به‌پێى ئه‌و زانیاریانه‌ى سه‌رچاوه‌یه‌كى ئه‌منیى ئاشكرایكردووه‌، توانیویانه‌ بكوژى ڕاسته‌قینه‌ى سه‌فا مه‌شهه‌دانى ئه‌ندامى ئه‌نجومه‌نى پارێزگاى به‌غداو هاوكات كاندیدى په‌رله‌مانى عێراق ده‌ستگیربكه‌ن.

سەرچاوەیەکی ئەمنی كه‌ ناوه‌كه‌ى ئاشكرانه‌كراوه‌ له‌ڕێگه‌ى میدیاى عێراقیه‌وه‌، وردەکاری نوێى سەبارەت بەتیرۆرکردنی سه‌فا مه‌شهه‌دانى ئەندامی ئەنجومەنی پارێزگای بەغدا كه‌ بەمدواییە بەتەقاندنه‌وه‌ى بۆمبێکی لكێندراو به‌ئۆتۆمبێله‌كه‌یدا تیرۆرکرا ئاشكراكردووه‌.

سه‌رچاوه‌كه‌ ڕایگەیاندووه‌، لەلێکۆڵینەوەکاندا دەرکەوتووە ئەو بڕە پارەیەی بۆ ئەنجامدانی تیرۆرەکە دراوە، بڕی 400 ملیۆن دیناری عێراقی بووە.

ئاماژەی بەوەشکردووه‌، "ئەم زانیاریانە ئاماژە بەوەدەکەن، پلان‌و بودجەیەکی زه‌به‌لاح لەپشت تیرۆرکردنی مەشهەدانیەوە هەبووە".

نووسینگەی ڕاگەیاندنی ئەنجوومەنی باڵای دادوەری لەبەیاننامەیەکدا نووسیویه‌تى، "لەلێکۆڵینەوەکاندا تێوەگلانی دوو تۆمەتبار دەرکەوتووە کە دانیان بەوەداناوە کە تاوانەکەیان ئەنجامداوە، ئه‌وان ڕۆڵی سەرەکییان هه‌بووه‌و لەڕێگەی بەڵگەی تەکنیکی‌و شیکردنەوەی تۆمارەکانی کامێرای چاودێرییەوە سەلمێنراوە".

به‌بێ ئه‌وه‌ى ناوى هیچ لایه‌نێكى سیاسیى یان هه‌رێمایه‌تى بهێندرێت، به‌یاننامه‌كه‌ ڕایگه‌یاندووه‌، "ئه‌وه‌ش ده‌ركه‌وتووه‌، تاوانه‌كه‌ په‌یوه‌ندیى به‌كێبڕكێى هه‌ڵبژاردنه‌وه‌ هه‌یه‌ له‌نێوان لایه‌نه‌كان‌و له‌و ڕووشه‌وه‌ ڕێكارى پێویست گیراوه‌ته‌به‌ر".

ئه‌مه‌ش له‌كاتێكدایه‌، وەزارەتی ناوخۆى عێراق ڕۆژى 21ى ئه‌م مانگه‌، دەستگیرکردنی پێنج تۆمەتبارى ڕاگه‌یاند كه‌ به‌تۆمه‌تى تێوەگلان لەتیرۆرکردنی سه‌فا مه‌شهه‌دانى ده‌ستگیركردووه‌، ئه‌وبش له‌میانى ئۆپەراسیۆنێكى ورد پاڵپشت به‌زانیاریى هه‌واڵگریى.