ئه‌میندارى حزبوڵڵا زانیاریى نوێ له‌باره‌ى هێرشكردنه‌سه‌ر ماڵى ناتانیاهۆ ئاشكراده‌كات

بۆ یەکەمجار ئەمینداری گشتیی حزبوڵڵای لوبنان، وردەکارییەکانی ئۆپەراسیۆنی بەئامانجگرتنی ماڵی بنیامین ناتانیاهۆ-ى سەرۆک وەزیرانی ئیسرائیل‌و هۆکاری ڕەتکردنەوەی سەردانی ئێرانی لەکاتی جەنگدا، ئاشکراکرد.

نەعیم قاسم ئەمینداری گشتیی حزبوڵڵای لوبنان لەچاوپێکەوتنێکدا لەگەڵ کەناڵی "ئەلمەنار"ی سەر بەحزبه‌كه‌ى چەند نهێنییەک لەبارەی بەئامانجگرتنی ماڵەکەى ناتانیاهۆو نەچوونی بۆ ئێران ئاشکرادەکات.

قاسم وتوویه‌تى، "هێرشکردنەسەر ماڵی بنیامین ناتانیاهۆ، کردەیەکی "مەبەستدار" بوو ئامانجەکەشی پێکانی ماڵەکەی یان خودی ناتانیاهۆ بووە، زانیاریی وردی نەخشەیی لەلایەن یەکێک لەبرایان لەمەیدانەوە بەدەستهاتبوو، کە توانیی نەخشەکە بەوردی دیاریبکات‌و هێرشەکە سەرکەوتووبێت".

سەبارەت بەهۆکاری سەردانینەکردنی ئێران، قاسم جەختیکردەوە، بڕیارەکە لەسەر بنەمای ڕەچاوکردنێکی ئەخلاقیی کەسی‌و ڕەچاوکردنێکی مەیدانی لەبەڕێوەبردنی شەڕەکەدا بووە، حزبوڵڵا خۆی بەسەرکردایەتی ناوخۆیی شەڕەکەی بەڕێوەبردووە، هەرچەندە خامنەیی، ڕابەری باڵای ئێران، هەموو جۆرە پشتیوانییەکی پێشکەشکردووەو بەوردی بەدواداچوونی بۆ شەڕەکە کردووە.

قاسم ئاشکرایکرد، حزبوڵڵا "ناوبەناو تەلئەبیبی کردووەتە ئامانج"، بەتایبەت پێش ڕێککەوتنی ئاگربەست بۆ "خێراترکردنی" پرۆسەکە.

هەروەها باسی لەوەشکرد، لێدانێکی کاریگەری 23ی ئەیلولی ڕابردوو، کە هەزارو 600 هێرش‌و 550 کوژراوی لێکەوتەوە، کاریگەری زۆری هەبووە.

قاسم جەختی لەوردبینی لەهێرشەکان‌و بەئامانجگرتنی تەنها "ئامانجە سەربازییەکان" کردەوە، بۆ پاراستنی بەرژەوەندییەکان‌و خۆپاراستن لەباجێکی گران.

لەکۆتاییدا، قاسم دووپاتیکردەوە، بڕیاری بەشداریی لە"شەڕی پشتیوانیکردنی غەززە" لەسەر بنەمای "سیاسیی، ئەدەبی، ئەخلاقی‌و باوەڕو قەناعەت" وەرگیراوە، ئەو ده‌ڵێت، "ئەم بەشداریکردنە لەشوێنی خۆیدا بووەو ئەگەر دووبارەش بێتەوە، بەهەمانشێوە دەمانکردەوە، چونکە ناتوانرێت ڕێگە بدرێت دوژمن بەشێوەی جینۆساید هێرشبکاتەسەر بەرگرییەک لەسەر سنوورەکان‌و دواتر ڕوو لەناوچەکانی دیکە بکات".