ئیسرائیل و سووریا لە ڕێککەوتنێکی ئەمنیی نوێ نزیک دەبنەوە

ئیرادە میدیا

سەرچاوە ئاگادارەکان ڕایانگەیاندووە کە دانوستانەکانی نێوان ئیسرائیل و سووریا، بە نێوەندگیریی چاودێرییانەی ئەمریکا، گەیشتوونەتە قۆناغی کۆتایی و پێشبینی دەکرێت پێش کۆتایی ئەمساڵ ڕێککەوتنێکی ئەمنی نوێ ڕابگەیەنرێت. ئەم ڕێککەوتنە بە مەبەستی چارەسەرکردنی پرسی باشووری سووریا و ڕێکخستنی دۆخی سنوورە دوای ڕووخانی ڕژێمی پێشوو دێت.

ئەمەریکا بە ئیسرائیلی ڕاگەیاندووە کە پێویستە پرسی باشووری سووریا پێش کۆتایی ساڵ چارەسەر بکرێت، ئەمەش خێرایی زیاتری بە دانوستانەکان بەخشیوە. دانوستانەکان بە شێوەیەک دەڕۆن کە ڕێککەوتنی داهاتوو هاوشێوەی ڕێککەوتننامەی جیاکردنەوەی هێزەکانی ساڵی ١٩٧٤ بێت، بە هەندێک هەموارکردنەوەی بچووکەوە.

یەکێک لە خاڵە گرنگەکان دیاریکردنی ئامادەیی هاوبەشی ئیسرائیلی-ئەمریکی-سووری لەسەر چیای هرمونـە، کە ناوچەیەکی ستراتیژیی زۆر هەستیارە.

ئیسرائیل بە فەرمی ئەمریکا و سووریای ئاگادار کردووەتەوە کە پاڵپشتی هیچ داواکارییەکی جیابوونەوەی ناوچەیی یان کەسایەتییەک ناکات، ئەمەش وەک دڵنیاییەک بۆ دیمەشق سەیر دەکرێت کە تەلئەبیب لە پڕۆژەی دابەشکاریی خاکی سووریادا نییە.

حکومەتی سووریا بەڵێنیداوە کە زیان بە دروزەکان نەگەیەنێت و پێداویستییە سەرەکییەکانیان دابین بکات. داواکاریی کردنەوەی ڕێڕەوێکی مرۆیی ڕاستەوخۆ لە ئیسرائیلەوە بۆ سویدا ڕەتکراوەتەوە، لە بری ئەوە گواستنەوەی هاوکاری و پێداویستییەکان لە ڕێگەی دیمەشقەوە ئەنجام دەدرێت، ئەمەش بە مەرجێکی سووری دادەنرێت بۆ پاراستنی سەروەریی خاکەکەی.

چاوەڕوان دەکرێت ڕاگەیاندنی فەرمی ئەم ڕێککەوتنە کۆتایی بە دۆخی نادڵنیایی لە باشووری سووریا بهێنێت و قۆناغێکی نوێ لە پەیوەندییەکانی نێوان دوو وڵات دەست پێ بکات.