ئیرادە ناوی سێ فەرماندەی هەسەدە ئاشکرا دەکات کە فەرماندەی سوپای نوێی سوریا دەکەن

ئیرادە میدیا

سیپان حەمۆ فه‌رمانده‌ى گشتیى یه‌كینه‌كانى پاراستنى گه‌ل (یه‌په‌گه‌) و هاوكات ئەندامی فەرماندەیی گشتیی هێزەکانی سوریاى دیموكرات (هه‌سه‌ده‌)، كه‌ به‌فه‌رمانده‌ ئاگرینه‌كه‌ى ڕۆژئاوا ناسراوه‌ ده‌ركه‌وته‌وه‌ و له‌وباره‌یه‌وه‌ ڕوونكردنه‌وه‌ ده‌دات.

سیپان حه‌مۆ ده‌ڵێت: ئێمە وه‌ك هه‌سه‌ده‌ دەمانەوێت هێزی سەرەکی بین له‌سوپاى نوێى سوریادا بۆ ئه‌وه‌ى به‌بێ جیاوازیى گەلی سوریا بپارێزین.

له‌مانگه‌كانى ڕابردوودا وا باسكرا هه‌سه‌ده‌ و ده‌سه‌ڵاته‌كه‌ى جۆلانى، ڕێککەوتوون لەسەر یەکگرتن‌و تێكه‌ڵكردنى هه‌سه‌ده‌و سوپا، بەگوێرەی ئەو ڕاپۆرتانە، هه‌سه‌ده‌ به‌وه‌رگرتنى فیرقەیه‌ك‌و دوو لیوا، ته‌ڤلى سوپای نوێی سوریا ده‌بن.

ئێستاش ڕاپۆرته‌كان باس له‌وه‌ده‌كه‌ن، سێ فەرماندەی پلە باڵای هه‌سه‌ده‌ ده‌ستنیشانكراون له‌لایه‌ن ئه‌مریكاوه‌، بۆ ئه‌وه‌ى سەرکردایەتی سوپای نوێی سوریا بكه‌ن.

ئیراده‌ میدیا ناوى ئه‌و فه‌رماندانه‌ى هه‌سه‌ده‌ى ده‌ستكه‌وتووه‌ بۆ سه‌ركردایه‌تیكردنى سوپاى نوێى سوریا كه‌ بریتین له‌(چیا کۆبانێ، لوقمان خەلیل‌ و جەمیل کۆبانێ).

له‌وباره‌یه‌وه‌ سیپان حەمۆ ئەندامی فەرماندەیی گشتی (هەسەدە)و فەرماندەی گشتیی (یەپەگە)، جەخت دەکاتەوەو دەڵێت: ئێمە لەسەرەتای دانوستانەکانەوە لایەنگری یەکگرتنی دیموکراسی‌و یەکگرتوویی هەموو هێزەکانی سوریا بووین.

دەشڵێت: ئەو ڕێککەوتنەی لەنێوان ژه‌نڕاڵ مه‌زڵوم عه‌بدى‌و شه‌رعدا واژۆى له‌سه‌ر كرا، گرنگ‌و مێژووییه‌و هیوادارین بكه‌وێته‌ وارى جێبه‌جێكردنه‌وه‌.