ململانێی واشنتن و تاران لەسەر "چیای قۆڵنگ"؛ ترەمپ هەڕەشەی لێدان دەکات و ئێران ڕەتی دەکاتەوە

ڕۆژی چوارشەممە (22ی تەممووزی 2026)، ئیسماعیل بەقائی، وتەبێژی وەزارەتی دەرەوەی ئێران لە ڕێگەی تۆڕی کۆمەڵایەتیی «ئێکس» ڕایگەیاند تەواوی چالاکییە ئەتۆمییەکانی وڵاتەکەی لەژێر چاودێری و ڕێکارەکانی ئاژانسی نێودەوڵەتیی وزەی ئەتۆمدان.تاران ڕەخنەی توند لە هەڕەشەکانی بەردەوامی واشنتن دەگرێت بۆ سەر دامەزراوە ئەتۆمییەکانی و ڕایدەگەیەنێت، ئەم هەڕەشانە بەپێی یاسا نێودەوڵەتییەکان ناڕەوان. 

ناوبراو ئاماژەی بەوەش کرد، تەرکیزکردنی ئەمریکا لەسەر "چیای قۆڵنگ" (Pickaxe Mountain) – کە هیچ چالاکییەکی ئەتۆمی تێدا نییە، تەنیا هەوڵێکە بۆ دۆزینەوەی بیانوو بە مەبەستی تێکدان و وێرانکاری.

ئەو بەرپرسەی ئێران، باسی لەوەش کرد، هەڕەشەکانی ئەمریکا پێچەوانەی میساقی نەتەوە یەکگرتووەکان و بڕیارنامەکانی ئەنجومەنی ئاسایشە و ئاماژەیە بۆ "دوژمنایەتییەکی قووڵ بەرامبەر زانست و گەشەپێدان". ڕاشیگەیاند هاووڵاتییانی ئێران بە هەموو توانایانەوە بەرامبەر هەر دەستدرێژییەکی ئەمریکا بۆ سەر سەروەریی وڵاتەکەیان دەوەستنەوە، هاوکات ڕەخنەی لە بێدەنگیی بەڕێوەبەری گشتیی ئاژانسی نێودەوڵەتیی وزەی ئەتۆم و نەتەوە یەکگرتووەکان گرت.

ئەم وەڵامەی تاران دوای ئەوە هات کە دۆناڵد ترەمپ، سەرۆکی ویلایەتە یەکگرتووەکانی ئەمریکا، ئاگاداری دایە ئێران و ڕایگەیاند بەم زووانە لێدان لەو شوێنانە دەست پێدەکەن کە گومانیان لێدەکرێت ئامێر و ماددەی ئەتۆمییان تێدا شاردراوەتەوە. ترەمپ جەختی کردەوە لەوەی ئاگاداری جووڵەکانی ئێرانن و ڕایگەیاند: "ئێران ناتوانێت هیچ بکات بۆ پاراستنی ئەو ناوچانە".

پێشتر، ڕۆژنامەی "وۆڵ ستریت جۆرناڵ" لە زاری بەرپرسانی هەواڵگریی ئەمریکا و ئیسرائیلەوە بڵاوی کردووەتەوە، تاران لە پاییزی ساڵی ڕابردوودا و دوای شەڕی 12 ڕۆژەی مانگی حوزەیران، هەزاران ئامێری سەنتەرفیوژی پیتاندنی یۆرانیۆمی بۆ تونێلە قووڵەکانی ناو "چیای قۆڵنگ" گواستووەتەوە.

چیای قۆڵنگ کە دەکەوێتە باشووری تاران و لە نزیک کۆمەڵگەی ئەتۆمیی نەتەنزە، خاوەنی تۆڕێکی تونێلی بەهێز و قووڵە. بەپێی هەڵسەنگاندنی شارەزایان، ئەم تونێلانە ئەوەندە قووڵ و قایمن کە لە دەرەوەی توانای بەهێزترین بۆمبە قەڵاشکێنەکانی ئەمریکادان، ئەمەش نیگەرانییەکانی واشنتن و تەل ئەڤیڤی لە ئەگەری دووبارە بنیاتنانەوەی بەرنامە ئەتۆمییەکەی ئێران زیاتر کردووە.