كۆبونەوەی پارتی و یەكێتیی ئەنجامی نەبووە، پێكهێنانی حكومەت زۆر دوادەكەوێت

 ✍️ سەرتیپ جەوهەر
كۆبونەوەی ئەمڕۆی پارتی و یەكێتیی هیچی لێ شین نەبووە. ناكۆكییەكانی پارتی و یەكێـتی قوڵن، ئەوەندەی لێمانەوە دیارە زەحمەتە بەمزوانە بتوانن حكومەتی نوێ‌ دروستبكەن.

ناكۆكییەكانی هەردوولا بەشێكی لەسەر پۆستەكانە، بەشەكەی دیكەی لەسەر شێوەی ئیشكردنی حكومەت و هەندێك گۆڕانكارییە لەحكومەت، بەڵام لەسەر هیچی نەگەیشتوونەتە رێككەوتن.

ئەوەی یەكێتیی و پارتی ناكۆكیان لەسەری هەیە جگە لەپرسی دابەشكردنی پۆستە باڵاكان و دابەشكردنی وەزارەتەكان، هاوكات گرفتەكان بەمشێوەیەی خوارەوەیە:

1- یەكێتیی داوای لابردن یان نەهێشتنی حكومەتی سێبەر دەكات، بەڵام پارتی رازی نییەو وتویانە ئەو كەسانەی لەئەنجومەنی وەزیران دامەزرێنراون و ئیشوكاری سێكتەرو وەزارەتە جیاوازەكان دەكەن لەلایەن سەرۆك وەزیران دامەزرێنراون و لایاننابەن.

2- یەكێتیی داوای لابردنی دەستەی سەرۆكایەتی پەرلەمان دەكات كە لەسەردەمی گۆڕان (د. یوسف محەمەد) سەرۆكایەتی پەرلەمان كراوەتە دەستەی سەرۆكایەتی و هەریەكە لەسەرۆكی پەرلەمان و جێگرەكەی و سكرتێری پەرلەمان دەبێت ئیمزا لەسەر بڕیارەكان بكەن. ئێستا یەكێتیی داوادەكات ئەو دەستەیە هەڵبگیرێت و مافی بڕیاردان لەئیشوكارەكانی پەرلەمان بگەڕێتەوە بۆ سەرۆكی پەرلەمان نەك لای دەستەی سەرۆكایەتی بێت.

3- یەكێتیی داوایكردووە سەرۆك و جێگری سەرۆك وەزیران وەك یەك پاكیج بەیەكەوە لەپەرلەمان دەنگیان لەسەر بدرێت، بۆئەگەر سەرۆك یان جێگر دەستیان لەكاركێشایەوە حكومەت بكەوێت، بەڵام پارتی رازیی نییە.

4- یەكێتیی لەدوایین كۆبونەوەكانیدا باسی گۆڕانكاریی لە ئەنجومەنی دادوەریی یان دەسەڵاتی دادوەریی كردووەو داوایكردووە ئەو دەسەڵاتە گۆڕانكاریی تێدابكرێت، گوایە بەتەواوی كەوتۆتە ژێر هەژموونی پارتی و بەسیاسی كراوە.

بۆ پارتی دواكەوتنی حكومەت نەك هیچ گرفتی نییە بەڵكو قازانجی زۆری هەیە، چونكە لەلایەك پەرلەمان لەكاركەوتووەو لەلایەكی دیكە هەموو حكومەت و جومگە گرنگەكانی حكومڕانی بەدەستە، بەبێ‌ گەڕانەوە بۆ پەرلەمان و هیچ لایەك، بڕیار دەردەكات و ئەندامانی خۆی لەپۆستی باڵای حكومەت دادەمەزرێنێت و گرێبەستی درێژخایەنی ئابوریی دەكات، بەڵكو لەوە واوەتریشی بەدەستەوەیە، بەڵام بۆ بارودۆخی هەرێم زۆر خراپە، چونكە هیچ دامەزراوەیەكی شەرعیی نەماوەو ئەوەی هەیە دەسەڵاتدارێتی حزبێكە و هیچیتر. بۆ یەكێتیش لەبانگەشەی هەڵبژاردن وەعدی زۆری بەخەڵكداوە، بەتایبەتیش ئەوەی پەیوەندی بەڕاستكردنەوەی هاوسەنگیی حوكمڕانییەوە هەیە هەیە، ئەگەر پابەندی جێبەجێكردنی وەعدەكانی نەبێت رەنگە زیانی گەورە بكات، بەتایبەت هەڵبژاردنی عیراق نزیكەی دوای كەمتر لە 8 مانگی دیكە پێویستە بكرێت.

ئەوەی دەبینرێت پارتی بەئاسانی نایەتە ژێرباری خوستەكانی یەكێتیی، بگرە بازنەی بزوتن و جوڵەی یەكێتیی و حزبەكانی دیكەش ئەگەر بچنە حكومەت تەسكتر دەكاتەوە، چونكە لەلایەك حكومەتی سێبەری دروستكردووە وەك مەنزومەیەكی بەدیل و فیعلیی حوكمڕانیی، لەلایەكی دیكە بەشێكی زۆری ئێشوكارو خزمەتگوزارییەكانی داوەتە كۆمپانیاكان و ئەوەی ماویشە بەقۆناغ دەداتە كەرتی تایبەت و كۆمپانیاكان (دیارە كۆمپانیاكان هی كێن) بۆیە ئەوەی بچێتە حكومەت بەتایبەت ئەو وەزارەتانە وەرگرێت كە ئیشوكارەكانیان دراوەتە كۆمپانیا، ناتوانێت هیچ بكات، تەنها پیاوخراپیەكەی بۆ دەمێنێتەوە.

كەوایە رێگاكانی بەردەم یەكێتیی بۆ رووبەرووبونەوەی ئەم بارودۆخە زۆر نین، تاكە رێگەیەك كە مسۆگەر بێت و بتوانێت هەم لەپەرلەمان یاخود لە دەرەوەی پەرلەمان بۆ رووبەرووبونەوەی پارتی و گێڕانەوەی هاوسەنگیی جكومڕانیی، ئەویش هەوڵدانە بۆ سازاندنی زەمینەی ئاشتەوایی گشتیی لەپێناو چاككردنەوەی لێكەوتە خراپەكانی بەر لە 8ی تەمموز (كۆنگرەی 4 ی 2020) و دوای 8ی تەمموزی 2021 كە بووە هۆی لێكترازانی زیاترو سەرئەنجام زیانی گەورەی لێكەوتەوە، بەڵام دەیكات؟ ئەوە جێدەهێڵین زەمەن وڵامی بداتەوە..