بەشێک لە پاره‌كه‌ی به‌غدا گه‌یشت و ده‌ست به‌دابه‌شكردنی مووچه‌ ده‌كرێت

ناوەندی هەواڵ

وەزارەتى دارایى هەرێم رایگەیاند، بەشێک لە تەمویلی مووچەی مانگی حوزەیران خرایە سەر هەژماری بانکی وەزارەتی دارایی و سەرەتاى هەفتەى داهاتووش دەستبەدابەشکردنى مووچە مانگە شەش دەکرێت.

ئەمڕۆ پێنج شەممە 4-7-2024، وەزارەتى دارایى هەرێم لە ڕاگەیەندراوێکدا بڵاویکردەوە، بڕى 231 ملیار و 605 ملیۆن و 531 هەزار دینار وەک تەمویلی شایستەی مانگی حوزەیرانی کەسوکاری شەهیدان و ئەنفالکراوان و زیندانیانی سیاسی و خاوەن پێداویستیە تایبەتەکان و خانەنشینانی شارستانی و سەربازی خرایە سەر هەژماری بانکی وەزارەتی دارایی و ئابوری لە لقی هەولێری بانکی ناوەندی عێراق. 

لە ڕاگەیەندراوەکەدا هاتووە، ڕۆژى یەکشەممە 7-7-2024،  دەست بەدابەشکردنی مووچەی سەرجەم ئەو توێژانە دەکرێت کەلەسەرەوە ئاماژە بەناوەکانیان دراوەو تەمویلەکەیان گەیشتۆتە سەر هەژماری وەزارەتی دارایی. 

ئەوە لەکاتێکدایە،  زیاتر لە 80 رۆژە هێزەئەمنییەکان یەک مووچەیان وەرگرتووە و هیچ وادەیەکیش بۆ پێدانى مووچەکانیان  لە ئارادا نییە.