له‌گوندێگى كوردستان خۆپیشاندان ئەنجامدرا و بریندارى لێکەوتەوە

ناوەندی هەواڵ

دژى ده‌ستبه‌سه‌راگرتنى زه‌ویه‌وى بازرگانى  دانیشتوانى گوندی کۆتۆل-ى سەر بەشاری خۆی لەپارێزگای ورمێ له‌ڕۆژهه‌ڵاتى كوردستان خۆپیشاندانیان ئه‌نجامدا و لە خۆپیشاندانەکەدا گرژى و ئاڵۆزى لێکەوتەوە و لە ئەنجامدا ژمارەیەک ژن بریندار کران.

بە گوێرەى زانیارییەکان ئەمڕۆ یەکشەممە 24-11-2024، دانیشتوانى گوندی کۆتۆل-ى سەر بەشاری خۆی دژى داگیرکردنى زەوییە بازرگانییەکانیان گردبونەوە و خۆپیشاندانیان ئەنجامدا، لە خۆپیشاندانەکەدا  گرژى لەنێوان خۆپێشاندەران‌ و پاسەوانی سنور دروستبوو، لەئەنجامدا چوار ژنە خۆپیشاندەر بەگولە بریندارکران.

وەک دانیشتوانى گوندەکە ئاماژەیان پێکردووە، ئەو پارچە زەوییەی کێشەی لەسەر دروستبووە، بەهاکەی 100 ملیۆن دۆلارە، لەکاتى خۆپیشاندانەکەدا لەلایەن پاسەوانی سنوری ئێرانەوە تەقەیان لێکراوە و ل ئەنجامدا چوار ژن برینداربون برینی یەکێکیان سەختە و لەژێر چاودێریی چڕدایە.

لە زانیاریەکانى دانیشتوانى گوندەکەدا هاتووە، هه‌شت کەسی دیکەی گوندەکەش لەلایەن هێزە ئەمنییەکانەوە دەستبەسەرکراون، چوار لەدەستبەسەرکراوەکانیش ژنن.

بڕیارە ئەمڕۆ وەک ناڕەزایی لەدژی بریندارکردنی ئەو ژنانە و دەستبەسەرکردنی ژن ‌و پیاوی ئەو گوندە، خەڵکی کۆتۆلی دووبارە خۆپیشاندان ئەنجام بدەنەوە.