کۆمسیۆن ئەنجامی هەڵبژاردنی پەرلەمانی کوردستان پەسندکرد

ناوەندی هەواڵ

كۆمسیۆنى باڵاى هه‌ڵبژاردنه‌كانى عێراق پەسەند کردنى ئەنجامى کۆتایى هه‌ڵبژاردنى په‌رله‌مانى كوردستان راگەیاند و دەڵێت، تەنها ماوە رادەستى سەرۆکایەتى هه‌رێم بكرێت.

لە 20ى تشرینی یەکەمی ئەمساڵ بە سەرپەرشتی کۆمسیۆنی باڵای سەربەخۆی هەڵبژاردنەکانی عێراق  هەڵبژاردنی خولی شەشەمی پەرلەمانى کوردستان بەڕێوەچوون ڕۆژى دواتر ئەنجامى بەرایی ڕاگەیەندرا، ژمارەیەک لە لیست و بەربژێرەکان ڕەخنەیان لە ئەنجامەکە هەبوو، بەڵام رۆژى 18ى تشرینی دووەمی 2024، دەستەى دادوەریی هەڵبژاردن، سەرجەم تانەکانى لەبارەى هەڵبژاردنى پەرلەمانى کوردستان رەتکردەوە.

نەبەرد عومەر بەرپرسی دەستەی هەڵبژاردنەکانی هەرێم لەکۆمسیۆنی باڵای هەڵبژاردنەکانی عێراق رایگەیاند، کۆمسیۆن ئەنجامی هەڵبژاردنی پەرلەمانی کوردستانى پەسەند کردووە، تەنها ئەوە ماوە ئەنجامەکە بۆ سەرۆکایەتیی هەرێمی کوردستان بنێردرێت.

نوسراوێكى ئه‌نجومه‌نی باڵای دادوه‌ریی كه‌ واژۆی دادوه‌ر حه‌سه‌ن فوئاد سه‌رۆكی ده‌سته‌ی دادوه‌ری هه‌ڵبژاردنه‌كانی له‌سه‌ره‌و ئاڕاسته‌ی كۆمسیۆنی هه‌ڵبژاردنه‌كان كراوه‌ تێیدا هاتوه‌، "ئاگادارتان ده‌كه‌ینه‌وه‌ كه‌ ده‌سه‌ڵاتی دادوه‌ری بۆ هه‌ڵبژاردن، هه‌مو ئه‌و تانانه‌ی سه‌باره‌ت به‌هه‌ڵبژاردنی په‌رله‌مانی هه‌رێم بۆی نێردراوه‌ له‌ماوه‌ی یاسایی یكلایی كردونه‌ته‌وه‌، یه‌كلاییكردنه‌وه‌ تانه‌كانیش به‌گوێره‌ى بڕگه‌كانی مادده‌ی (10/حه‌وته‌م) له‌یاسای كۆمسیۆنی باڵای هه‌ڵبژاردنه‌كان ژماره‌ (31)ی ساڵی 2019 بوه‌".

 به‌گوێره‌ی ئه‌و تانانه‌ی تۆماركرابون، 25 تانه‌یان له‌ سلێمانی، 12یان له‌ هه‌ولێر، سێیان له‌ دهۆك و تانه‌یه‌كیش له‌ پارێزگای هه‌ڵه‌بجه‌ بوه‌ كه‌ له‌لایه‌ن چاودێری لایه‌نه‌ سیاسیه‌كانه‌وه‌ تۆماركرابون.