ئامەد: دادگا سزای زیندانی هەتاهەتایی بەسەر دایك و مام و برایەكی نارین گوراندا سەپاند

ناوەندی هەواڵ

دادگای ئامەد بڕیاری كۆتایی لەبارەی دۆسییەی نارین گورانەوە دا، سزای زیندانی هەتاهەتایی بەسەر دایك و مام و برایەكی ناریندا سەپاند.

دادگای ئامەد لە چوارەمین دانیشتنیدا لەبارەی دۆسییەی نارین گورانەوە بڕیاری كۆتایی لەبارەی دۆسییەكەوەدا، لە بڕیارەكەشیدا سزای زیندانی هەتاهەتایی بەسەر دایك و مام و برایەكی نارین گوراندا سەپاند، كە تۆمەتباری سەرەكی دۆسییەكەن، هەروەها سزای زیندانی چوار ساڵ و شەش مانگی بەسەر نەوزاد بەختیار دراوسێیەكی ماڵی ناریندا سەپاند، كە بە دانپێدانانی خۆی تەرمی نارین گورانی شاردووەتەوە.

بەپێی بڕیارەکەی دادگا ئەو سزایەی بەسەر دایك و مامی و برای نارین گوراندا سەپێنراوە، لێبوردنی گشتی نایانگرێتەوە.

دادگای ئامەد چوار جار دانیشتنی لەبارەی دۆسییەی نارین گوران ئەنجامدا و لە چوارەمین دانیشتندا، كە سێ ڕۆژی خایاند، دادگا دەرفەتی دایە تۆمەتباران و پارێزەرەكانیان بۆ دوایین جار بەرگری یاسایی لە خۆیان بكەن بەڵام لەکۆتاییدا دادگا بڕیاری یەکلاکەرەوەی دەرکرد.

نارین گوران، لە 21ی ئابی ئەمساڵ لە گوندی چولی سەر بە شارۆچكەی ڕەزانی ئامەد بێسەروشوێن بوو، دواتر لە ڕۆژی 8ی ئەیلولی 2024، تەرمەكەی لە ناوچەی ئۆغڵاری سەر بە ئامەد دۆزرایەوە، لە ئێستاشدا 12 كەس بە تۆمەتی كوژرانی نارین دەستگیركراون.