"هەسەدە" لەناو بردنی دوو سیستەمی ڕاداری تورکیای ڕاگەیاند

ناوەندی هەواڵ

ئەمڕۆ دووشەممە، هێزەکانی سوریای دیموکرات لەناوبردنی دوو ئامێری ڕادار و سیستمی شێواندن و زرێپۆشێکی سەر بە سوپای تورکیایان لە ڕۆژئاوای پردی قەرەقۆزاقی باشووری کۆبانی ڕاگەیاند.

لە بەیاننامەیەکدا "هەسەدە" ڕایگەیاند، تورکیا "دۆخی ئێستای سوریا دەقۆزێتەوە و بنکەی سەربازی نوێی لە ناو خاکی سوریا دامەزراندووە".

ئاماژەبەوەشکراوە، "تورکیا دوو بنکەی نوێی لە مونبج و ڕۆژئاوای ڕووباری فورات دامەزراند و لە وەڵامی ئەو داگیركەرییە، هێزەکانمان ئۆپەراسیۆنێكیان ئەنجامدا و دوو ئامێری ڕادار و سیستەمێکی شێواندن و ئۆتۆمبێلێکی زرێپۆشی هێزەكانیتوركیایان لە ڕۆژئاوای پردی قەرەقۆزاق لەناوبرد".

تورکیا هەڕەشەی داگیرکردنی ناوچە كوردیەكانی ڕۆژئاوای كوردستان و شاری كۆبانێ دەكات، لە ڕاگەیەندراوەکەی "هەسەدە"دا هاتووە "ئەم هەوڵانەی تورکیا لە چوارچێوەی پلانی داگیرکەریدایە بۆ داگیركردنی خاكی سوریا، و پلانێكی کۆلۆنیالیزمی ئاشكرایە".