ئەنجومەنی وەزیران سبەینێ تایبەت بە داواكارییەكانی بەغداد كۆدەبێتەوە

ناوەندی هەواڵ

وتەبێژی حكومەتی هەرێمی كوردستان ڕایگەیاند، تەوەرەكانی كۆبوونەوەی داهاتووی ئەنجومەنی وەزیران پەیوەستن بە مووچە و داراییەوە و ڕاپۆرتێكیش دەربارەی دۆخی دارایی 2024 دەخرێتەوەڕوو.
پێشەوا هەورامانی، وتەبێژی حكومەتی هەرێمی كوردستان ڕایگەیاند، سبەینێ چوارشەممە ئەنجومەنی وەزیرانی هەرێمی كوردستان كۆدەبێتەوە و تەواوی بڕگەكانی كۆبوونەوەكە پەیوەندییان بە بابەتی دارایی و پرسی مووچەوە دەبێت.
وتیش: لە كۆبوونەوەكەدا ڕاپۆرتێك لەبارەی دۆخی دارایی ساڵی 2024 دەخرێتەڕوو، هەروەها بابەتی بایۆمەتری و ناردنی زانیارییە داواكراوەكان بۆ بەغدادو ڕاپۆرتیك لەبارەی بەرەوپێشچوونەكانی پڕۆژەی بە ئەلیكترۆنیكردنی ناوەندی خشتەی مووچەخۆرانی هەرێم دەخرێتەڕوو.
كۆبوونەوەكە لەكاتێكدایە، لەگەڵ كۆتاییهاتنی دابەشكردنی مووچەی مانگی 11ی 2024 و بەردەوامبوونی ئەو مشتومڕانەی كە دەربارەی مووچەی مناگی 12 هەیە، بەغداد دەڵێت پارەی مووچەم بە تەواوی ناردووە و هەرێمی كوردستانیش دەڵێت نە مووچە بە تەواوی نێردراوە نە ئەو پشكەش كە لە بودجەدا بۆ هەرێم دەسنیشانكراوە.