مەسعود بارزانی: داوا لە پارتی و یەکێتی دەکەم پەلە بکەن لە پێکهێنانی کابینەی نوێ

ناوەندی هەواڵ

مەسعود بارزانی، سەرۆکی پارتی دیموکراتی کوردستان ڕایگەیاند، داوا لە پارتی و یەکێتی دەکەم پەلە بکەن لە پێکهێنانی کابینەی نوێ، چونکە گۆڕانکاری زۆر لە ناوچەکە ڕوودەدات و ڕوویداوە.

بارزانی ئەمڕۆ چوارشەممە9ی نیسانی2025،لەکاتی کردنەوەی 17یەمین پێشانگەی نێودەوڵەتی هەولێر بۆ کتێب وتی: گۆڕانکاری لە ناوچەکە ڕوویداوە و بەرپرسیارێتی گەورە لە هەرێمی کوردستان دەکەوێتە سەر شانی پارتی و یەکێتی.

بارزانی وتیشی،هیوادارین ئەو شەڕەی بەرۆکی چەند وڵاتێکی گرتووەتەوە کۆتایی پێ بێت، بەتایبەتی لە غەززە و لوبنان.

دەربارەی کێشەکانی نێوان هەولێر و بەغدا،  بارزانی باسی لەوە کرد، تاڕادەیەکی باش کێشەکانی نێوانیان چارەسەر کراون، بەڵام هێشتا زۆری ماوە، "دۆخی عێراق بەگشتی لەدوای رووخانی رژێمی بەعس لە ساڵی 2003، عێراقی نوێ لەسەر سێ بنەمای سەرەکی پێکهات، ئەوانیش: هاوبەشی، هاوسەنگی و سازانن؛ بەڵام بەداخەوە پابەندبوونی پێوە نەکرا، هەروەها ساڵی 2005 دەستوورێک بۆ عێراق نووسرا کە کورد رۆڵێکی سەرەکیی تێدا بینی و 85%ی خەڵکی عێراق دەنگیان پێدا، ئەگەر پابەند بوونایە بەو دەستوورە، زۆرێک لە گرفتەکان کە رووبەڕووی خەڵکی عێراق بەگشتی و پەیوەندیی هەرێمی کوردستان و بەغدا بوونەتەوە، روویان نەدەدا، ئێستاش چارەسەری بنەڕەتی گەڕانەوەیە بۆ ئەو سێ بنەمایە و پابەندبوون بە دەستوور."