دوای بڕیاری خۆهەڵوەشانەوەی پەکەکە دەرکردنی سوپای تورکیا یەکێکە لە کارە لەپێشینەکان بۆ پەرلەمانی عێراق

ناوەندی هەواڵ

دوای دەکردنی بڕیاری خۆهەڵوەشاندنەوەی پارتی کرێکارانی کوردستان ( پەکەکە )، دەرکردنی سوپای تورکیا لە خاکی هەرێمی کوردستان و عێراق یەکێکە لە کارە لەپێشینەکانی پەرلەمانی عێراق و پەرلەمانتارێکیش دەڵێت "هەبوونی سوپای تورک  هەرەشەیە بۆسەر ئاسایشی عێراق و پێویستە هەنگاوی کرداری بۆ دەرکردنیان بگیرێتە بەر . 

عەلا حەیدەری، پەرلەمانتاری سەربەخۆ لە پەرلەمانی عێراق ڕایگەیاند : پەکەکە بە دواهەمین بڕیاری خۆی، هەموو بیانووەکانی بوون و مانەوەی سوپای تورکیای بڕی، چیتر ئەو سوپایە بیانووی مانەوەی نیە لە خاکی عێراق .

حەیدەری دەڵێت "مانەوەی سوپای تورکیا لە عێراق دەبێتە هەڕەشە بۆسەر ئاساییشی وڵاتەکە، بەتایبەتی لە پارێزگای نەینەوا، بەوپێیەی ئەو وڵاتە و سوپاکەیان لە دەوروشبەری موسڵ هەمەهانگیان هەیە لەگەڵ هەندێک گروپ و لایەنی ناوخۆیی و سەربازگەی بەعشیقەش وەک شوێنی مەشق و ڕاهێنان بەکاردەهێنن کە دەکرێت لە داهاتوودا وەک هەڕەشەیەکی دیکە لە دژی سەروەری وڵاتەکە بەکاربهێنرێتەوە .

عەلا حەیدەری دەڵێت چارەسەر ئەوەیە : لایەنە پەیوەندیدارەکان و حکومەتی عێراقی هەرچی زووە دەستبەکاربن بۆ دەرکردنی سوپای تورکیا و چۆڵکردنی سەربازگە داگیرکراوەکان ، ئەگەر نا ئەواو لە ئایندەدا تورکیا دەبێتە مەترسیەکی دیکە بۆ سەر ئاسایش و سەقامگیری وڵاتەکە .