شاسوار عەبدولواحید روبەڕوى 79 داواى یاسایى دەكرێتەوە

پاش ئەوەى لە ڕۆژی پێنجشەممەی ڕابردودا دادگای سلێمانی دادگاییکردنی شاسوار عەبدولواحید، "سەرۆکی جوڵانەوەى نەوەی نوێ" دوای 18 ڕۆژ لە دەستگیرکردنی، بۆ ڕۆژی سێشەممەی داهاتو دواخست، لە ئێستادا لایەنگرانى نەوەى نوێ مەترسیى ئەوەیان هەیە سەرۆكى جوڵانەوەكەیان سزایەكى قورسى بۆ دەربچێت.

لەمبارەیەوەو بەپێى زانیارییەكانى ئیرادە، سەرچاوەیەكى دادوەریى ئەوەى ئاشكراكردوە، كە بڕیارى دواخستنى دادگاییكردنەكەى ناوبراو بەهۆى ئەو داوا یاساییە زۆرانەوە بون كە لە دژى تۆماركرابون و تا ئێستاش داواكان گەیشتونەتە 79 داواى یاسایى و لەنێویاندا 70 سكاڵایان تەنها لەسەر دۆسیەى پشكەكانى "چاڤى لاندە"و خاوەن پشكەكان تۆماریان كردوە.

هەر بەگوێرەى زانیارییەكانى ئیرادە، پێنچ سكاڵاى ترى تۆماركراو لەلایەن دەزگا حكومییەكانەوە بوە كە سەرجەمیان پەیوەستن بە قەرزە نەدراوەكانى كۆمپانیاكانى "شاسوار عەبدولواحید"ەوە.

ئیرادە ئەوەشى زانیوە كە دادوەر لە دانیشتنى داهاتودا بڕیار دەدات كە ئایا " سەرۆکی جوڵانەوەى نەوەی نوێ"  بە کەفالەت ئازاد بکرێت یان ماوەی دەستبەسەرکردنی درێژبكرێتەوە.

جێى ئاماژەیە پێشتر و لە رۆژى 23ى ئاب دا؛ سروە عەبدولواحید، سەرۆكى لیستى نەوەى نوێ لە پەرلەمانى عێراق ئاماژەى بەوەدابو كە باری تەندروستی سەرۆكى جوڵانەوەكەیان لە زیندان تێكچوەو رێگریى كراوە لە سەردانیكردنى ناوبراو.

سەرۆكى لیستى نەوەى نوێ لە پەرلەمانى عێراق هۆشدارییدا لەوەی "بە وتەى خۆى" شەقامی کوردی لە بەرانبەر ئەم پێشێلکارییانەدا بێدەنگ نابێت.