ئەمریكا چیتر هەسەدە وەك لقێكى پەكەكە تەماشا ناکات

تۆم باراك نێردەی تایبەتی سەرۆكى ئەمریکا بۆ کاروباری سوریا، گفتوگۆی بەردەوامی نێوان مەزڵوم عەبدی، فەرماندەی هێزەکانی سوریای دیموکرات و هاکان فیدان، وەزیری دەرەوەی تورکیاى پشتڕاستکردەوە.

لە چاوپێکەوتنێکی ڕۆژنامەوانیدا ڕۆژی هەینی، باراك تیشکی خستە سەر گفتوگۆی بەردەوامی نێوان جەنەڕاڵ مەزڵوم عەبدی و کەسایەتییە باڵاکانی تورکیا وەک هاکان فیدان، وەزیری دەرەوەی ئەو وڵاتە و ئیبراهیم کالن، سەرۆکی دەزگاى هەواڵگریی.

بە وتەی نێردەی ئەمریکا، ئەم هەوڵانە بە پاڵپشتی ڕەجەب تەیب ئەردۆغان، سەرۆککۆماری تورکیا، بۆ بنیاتنانی متمانە لە سەرانسەری ئەو سنورە ناجێگیرە مێژووییەدا زۆر گرنگە.

باراك ئاماژەی بەوەشدا کە ئەگەرچى تورکیا هاوپەیمانێکی گەورە بوە، بەڵام زۆرجار بە هەڵە تێگەیشتوە.

هەر لەو چاوپێكەوتنەدا نێردەی تایبەتی سەرۆكى ئەمریکا بۆ کاروباری سوریا هێمای بۆ ئەوە کردوە کە پەیوەندی ئەنقەرە لەگەڵ هێزە کوردییەکان لە سوریا، سەرەڕای ململانێی قوڵ، نیشاندەری ئەوەیە کە دیالۆگ مومکینە، لەبەرئەوە پێویستمان بە گفتوگۆیە، بۆئەوەى خوێنڕشتنی دەیان ساڵە جارێكى تر دوبارە نەبێتەوە.

سەبارەت بە حكومەتى سوریاش، ناوبراو ڕونیکردەوە، بەهۆی دابەشبونی تائیفی و پارچەپارچەبونی سیاسی؛ وڵاتەکە بە ئیفلیجى ماوەتەوە.

هاوكات، نێردەی تایبەتی سەرۆكى ئەمریکا داوای لە سەرکردەکانی سوریا کرد واز لە "پەشیمانی ڕابردو" بهێنن و چوارچێوەی نوێ بگرنەبەر کە مانەوە و پێکەوەژیان لە پێشینەی کارەکانیاندا بێت.

لەلایەكى ترەوەو بەپێى راپۆرتە میدیاییەكانى رۆژئاواو ناوچەكە، ئەمریكا چیتر هەسەدە وەکو لقێکی سەر بە پارتی کرێکارانى كوردستان تەماشا ناکات بەڵكو هێزەكانى سوریاى دیموكرات بە هاوپەیمانێكى سەرەكى حكومەتى "واشنتۆن" دەزانێت.

جێى ئاماژەیە پێشترو لە سەرەتاى ئەمساڵدا، لە کۆنگرەی ڕۆژنامەوانیى دا لە ئیستانبوڵ، هاکان فیدان  ئاماژەى بەدیدارێكى تایبەت لەگەڵ مەزڵوم عەبدى فەرماندەی هێزەكانى سوریاى دیموكرات دابو، بەڵام بەهۆى هەندێك پێشهاتى سیاسییەوە دیدارەكە ئەنجام نەدرا.