باڵیۆزخانەى ئۆكرانیا: مەشق و راهێنانمان بە كەس نەكردوە

پاش ئەوەى دەزگای ئاسایشی هەرێمی كوردستان، رۆژی 27ی ئەم مانگە، "دانپێدانان"ی بەشێک لەگیراوانی شەڕەکەی "لالەزار"ی بڵاوكردەوەو تێیدا ئاماژە بەوەدرابو كە بەشێك لە هێزەکە چونەتە ئۆكرانیا و لەوێ مەشق و راهێنانیان لەسەر درۆن و چۆنیەتی دروستكردنی درۆن بینوە لەپێناو "تێكدان"ی ئاسایشی هەرێم و "تیرۆركردنی سەرۆكی یەكێتی"، بەڵام ئەمڕۆ شەممە، باڵیۆزخانەی ئۆكرانیا لە بەغدا لە بەیاننامەیەك دا  سەبارەت بە تێوەگلانى وڵاتەكەى لە مەشق و راهێنانى ئەو كەسانەى چالاكى نایاساییان لەسەر خاكى هەرێم ئەنجامداوە، ئەو تۆمەتانە رەتدەكاتەوە.

ئیرادە، دەقى بەیاننامەكەى باڵیۆزخانەی ئۆكرانیا لە عێراق وەك خۆى بڵاودەكاتەوە:

باڵیۆزخانەی ئۆكرانیا لە کۆماری عێراق بە توندی ئەو ڕاپۆرتە هەڵبەستراوانەى کە لە هەندێک لە دەزگاکانی ڕاگەیاندن دەرکەوتون و باس لەوە دەکەن لایەنی ئۆکرانی لە ئامادەکردن یان ڕاهێنانی ئەو کەسانەی کە تێوەگلاون لە چالاکی نایاسایی لەسەر خاکی عێراق یان هەرێمی کوردستانی عێراق، رۆڵى هەبوە، ڕەتدەکاتەوە.

ئۆكرانیا هەرگیز هیچ چالاکییەکی پەیوەست بە ڕاهێنانی چەکداران یان دروستکردنی فڕۆکەی بێفڕۆکەوان بۆ بەکارهێنانی نایاسایی لە دەرەوەی خاکەکەی ئەنجام نەداوەو ئەنجام نادات. ئەم تۆمەتانە بە ئاشکرا چەواشەکارانەن و لە ڕاستیدا هیچ بنەمایەکیان نییە،  ئێمە بڵاوکردنەوەی ئەو جۆرە زانیارییە ناڕاستانە بەهەوڵێک دەزانین بۆ ناوبانگ زڕاندنى ئۆكرانیا و سەرکردایەتییەکەی.

باڵیۆزخانەی ئۆكرانیا لە عێراق داوا لە میدیاکان دەکات تەنها پشت بە سەرچاوە فەرمی و باوەڕپێکراوەکان بۆ زانیاری ببەستن و خۆیان لە بڵاوکردنەوەی دەنگۆ و ڕاپۆرتی پشتڕاستنەکراو بەدور بگرن.