له‌پێنجشه‌ممه‌وه‌ كوژراون.. ئه‌مڕۆ حوسیه‌كان دانیان پێدانا

حوسییەکان بەفەرمی کوژرانی ئەحمەد غالب ڕەهەوی سەرۆک وەزیرانی یه‌مه‌ن و ‌محه‌مه‌د الغامرى سه‌رۆك ئه‌ركانى حوسیه‌كان و ژمارەیەك لەوەزیرەكانی لەلایەن ئیسرائیلەوە ڕاگەیاند.

سه‌رۆكایه‌تیی كۆماری یه‌مه‌ن دوێنێ هه‌ینى ڕاگه‌یه‌نراوێكى بڵاوكرده‌وه‌و كوژرانی سه‌رۆك وه‌زیران‌و ژماره‌یه‌ك له‌هاوكارانی له‌ئه‌نجامی هێرشی ئیسرائیل بۆ سه‌ر ئه‌و وڵاته‌ ڕاگه‌یاند.

سه‌رۆكایه‌تیی كۆماری یه‌مه‌ن ڕاگه‌یه‌نراوێكی بڵاوكرده‌وه‌و ئاماژه‌ى به‌وه‌داوه‌، ئه‌حمه‌د غالب ڕه‌هه‌وی پێنجشه‌ممه‌ی ڕابردوو له‌ئه‌نجامی هێرشه‌كانی ئیسرائیل بۆسه‌ر ئه‌و وڵاته‌ له‌گه‌ڵ ژماره‌یه‌ك له‌هاوكاران‌و هاوڕێیانی دیكه‌ی كوژراون.

هاوكات بزوتنه‌وه‌ی حوسییه‌كانی یه‌مه‌ن له‌ڕاگه‌یه‌نراوێكدا سه‌ركۆنه‌ی هێرشه‌كانی ئیسرائیلی بۆسه‌ر وڵاته‌كه‌یان كردوه‌و ده‌ڵێت:"ئه‌حمه‌د غالیب ڕه‌هه‌وی له‌به‌ر هه‌ڵوێستی به‌رگریكارانه‌ی له‌دۆزی فه‌ڵه‌ستین‌و گه‌لی یه‌مه‌ن كوژراوه‌، بۆیه‌ به‌ڵێنده‌ده‌ین له‌دژایه‌تیكردنی ئیسرائیل به‌رده‌وامبین".

حوسییه‌كانی یه‌مه‌ن ده‌ڵێت:"ژماره‌یه‌ك له‌هاوكاران‌و هاوڕێیانى ئه‌حمه‌د غالیب ڕه‌هه‌وی بریندارن‌و برینی هه‌ندێكیان سه‌خته‌و له‌نه‌خۆشخانه‌كاندا چاره‌سه‌رى به‌په‌له‌ وه‌رده‌گرن".

پێنجشەممە 28ی ئابی 2025، کەناڵی 12ی ئیسرائیلی بڵاویکردەوە، فڕۆکە جەنگییەکانی ئیسرائیل، زیاتر لە 10 شوێنی لەسەنعای پایتەختی یەمەن بۆردومانکرد.

کاناڵەکە ئاماژەی بەوەکردبوو، فڕۆکە جەنگییەکانی ئیسرائیل شوێنی نیشتەجێبونی بەرپرسە باڵاکانی حوسییەکانی کردوەتەوە ئامانج.

ئه‌وكات میدیای نزیک لەحوسییەکان، ئەو هەواڵانەی ڕەتکرده‌وه‌و باسیان لەوەكردبوو، بەرپرسە باڵاکانی حوسییەکان لەهێرشەکانی ئیسرائیل بۆسەر شاری سەنعا نه‌كراونه‌ته‌ ئامانج.