سه‌رچاوه‌یه‌كى حكومى له‌به‌غداوه‌: موچه‌ى مانگى حه‌وتى فه‌رمانبه‌رانى هه‌رێم ئاماده‌یه‌

به‌گوێره‌ى ئه‌و زانیاریانه‌ى له‌سەرچاوەیەکی ئاگاداره‌وه‌ ده‌ستكه‌وتوه‌، خه‌رجكردنى موچه‌ى مانگی حه‌وتى موچه‌خۆران‌و فه‌رمانبه‌رانى هه‌رێم ئاماده‌یه‌و ته‌نها یه‌ك ڕه‌زامه‌ندى ته‌یف سامى وه‌زیرى دارایی ماوه‌.

ماڵپه‌ڕى (به‌غداد ئه‌لیه‌وم) له‌زارى سەرچاوەیەکی ئاگاداره‌وه‌ ئاشکرایکردوه‌، پاره‌ى موچه‌ى مانگى ته‌مموز (مانگى 7) بۆ موچەی موچه‌خۆران‌و فەرمانبەرانی هەرێم به‌رده‌سته‌و هیچ كێشه‌یه‌كى سیویله‌ بونى نییه‌.

به‌وته‌ى سه‌رچاوه‌كه‌، "پارەیه‌كى زۆرى نەختینە له‌بانكى ناوه‌ندیى بەردەستەو موچەى موچه‌خۆرانى هه‌رێمیش ئامادەیە، بەڵام ئه‌وه‌ى ماوه‌ته‌وه‌ ڕەزامەندیه‌كى وەزیری دارایی عێراقه‌و ماوه‌ته‌وه‌ سه‌ر پابه‌ندبونی هه‌رێم به‌سه‌رجه‌م ئه‌و داواكاریانه‌ى به‌غدا لێى هه‌یه‌".

ئه‌و سه‌رچاوه‌یه‌ وتویه‌تى، "مەرجەکانى ناردنى پاره‌ له‌به‌غداوه‌ بۆ موچه‌ى فه‌رمانبه‌رانى هه‌رێم بریتین لەدەستپێکردنەوەی هەناردەکردنی نەوت لەماوەی 48 کاتژمێردا، چارەسەرکردنی کێشەی داهاتی ناوخۆو نانه‌وتى، له‌گه‌ڵ قبوڵکردنی چارەسەری یاسایی کە لەلایەن ئەنجومەنی دەوڵەتەوە دەرده‌چێت".

موچەی فەرمانبەرانی هەرێم لەماوەی چەند مانگی ڕابردودا كێشه‌یه‌كى گه‌وره‌و ماوه‌ درێژى به‌دواى خۆیداهێنا لەنێوان حکومەتی فیدراڵی‌و حکومەتی هەرێم، ئەوەش بەهۆی بەردەوامی ناکۆکی لەسەر هەناردەکردنی نەوت‌و داهاتی ناوخۆو تائێستا ئه‌و كێشه‌یه‌ چاره‌سه‌رنه‌كراوه‌و موچه‌ى فه‌رمانبه‌رانیش له‌هه‌رێم بوه‌ته‌ وه‌رزیى.

ئه‌مڕۆ 17ى 9ى 2025، به‌ڵام فه‌رمانبه‌ران‌و موچه‌خۆرانى هه‌رێم ته‌نها موچه‌ى مانگى حوزه‌یران (مانگى 6)یان وه‌رگرتوه‌و هیچ واده‌یه‌كیش دیارنییه‌ بۆ دابه‌شكردنى موچه‌كانى دیكه‌یان‌و موچه‌ى شه‌ش مانگى ئه‌مساڵ له‌به‌رده‌م فه‌وتان‌و نه‌داندان.