مانگێك به‌ر له‌ده‌ستگیركردنى لاهور شێخ جه‌نگى ناوى حزبه‌كه‌ى گۆڕیوه‌

به‌گوێره‌ى ئه‌و زانیاریانه‌ى سه‌رچاوه‌یه‌كى باڵاى به‌ره‌ى گه‌ل ئاشكرایكردوه‌، مانگێك به‌ر له‌وه‌ى ده‌ستگیربكرێت‌و ڕوداوه‌كه‌ى لاله‌زار ڕوبدات، لاهور شێخ جه‌نگى ناوى حزبه‌كه‌ى گۆڕیوه‌و به‌ناوه‌ تازه‌كه‌وه‌ به‌شداریى هه‌ڵبژاردنى په‌رله‌مانى عێراق ده‌كات.

نزیکەی مانگێکە لاهور شێخ جەنگی سەرۆکی بەرەی گەل دەستگیرکراوە، بەڵام پێشئەوە، ناوی حزبەکەی گۆڕیوە له‌(به‌ره‌ى گه‌ل)ه‌وه‌ بۆ (بەرەی گەلەكەمان -جبهە شعبنا)، به‌و ناوه‌ تازه‌یه‌ش بەشداریی لەهەڵبژاردنی خولی شەشەمی پەرلەمانی عێراق دەکات.

له‌وباره‌یه‌وه‌ شادومان مەلا حەسەن سه‌ركرده‌ى دیارى به‌ره‌ى گه‌ل ئاشكرایكردوه‌، "ئێمە بەدوو ناو حزبەکەمان تۆمارکردوە، لەکوردستان بەناوی بەرەی گەل‌و لەعێراقیش (جبهە شعبنا) تۆمارکراوە، واتا دوو حزبمان هەیە، یەکێک بۆ هەڵبژاردنەکانی کوردستان‌و یەکێکی دیكه‌ش بۆ هەڵبژاردنەکانی عێراقه‌".

سەبارەت بەدۆخی لاهور شێخ جەنگی لەزیندان، شادومان مەلا حەسەن وتویه‌تى، "تەندروستی باشە، ئازادکردنیشی پەیوەستە بەبڕیاری دادگا یان بڕیاری سیاسییه‌وه‌، تائێستاش نەبراوەتە بەردەم دادوەرو هیچ بڕیارێكى سیاسیشى بۆ دەرنه‌کراوە".