لەسلێمانی پڕۆژەی دانانی کامێراو GPS بۆ پاسی خوێندکاران دەکەوێتە کار

بەڕێوەبەرایەتی گشتی پەوەردەی  سلێمانی  ڕایدەگەیەنێت، لەبارەی دانانی کامێرا و جی پێ ئێس رێنمایی تەواو دراوە بەو کۆمپانیایانەی کە بەشداردەبن لە گواستنەوەی خوێندکاران.

بەڕێوەبەرایەتی گشتی پەروەردەی سلێمانی  دەڵێت “ئەمڕۆ چوارشەممە ٢٢ی ئۆکتۆبەری ٢٠٢٥ کۆبوونەوەیەکی تایبەت بۆ بەگەڕخستنی سیستمی کامێرا و جی پێ ئێس  بۆ ناو ئەو ئۆتۆمبێلانەی کە خوێندکاران هاتوچۆ پێدەکەن، ئەنجامدراوە”.

بەگوێرەی ڕاگەیەندراوەکەی پەروەردە “ئامادەکاری و رێنمایی یاسایی پێویست بۆ ئەو کۆمپانیا و لایەنە پەیوەندیدارانە خراوەتەڕوو کە بەشداردەبن لە گواستنەوەی خوێندکاران، تا بە زووترین کات کارە یاساییەکان تەواوبکەن، ئەوەش لەپێناو ئەوەی پرۆژەی دانانی کامێرا و جی پێ ئێس لەناو ئەو ئۆتۆمبێلانەی خوێندکاران هاتوچۆ پێدەکەن بکەوێتەکار”.

بەپێی قسەی بەرپرسانی پەروەردەی سلێمانی، دانانی کامێرا و جی پی ئێس (دیاریکەری شوێن) لەناو پاسی خوێندکاراندا، بۆ کۆنترۆڵکردنی سەرپێچیی شۆفێرانە، ئەویش  لە ئەنجامی سەرپێچیی زۆری شۆفێرانی پاس و تاکسی و، بەهۆی ئەو هەموو رووداوە نەخوازراوانەی کە روو دەدەن، لەکاتی گواستنەوەی خوێندکاران و گەشتی بەهارەو  گەشتە زانستیەکانیاندا. 

بەشێوەیەکی گشتی  دانانی کامێرای چاودێری  و جی پی ئێس لەناو پاسەکانی گواستنەوەی خوێندکاران، پرۆژەیەکە   دایک و باوکان و سەرپەرشتیاران دەتوانن بەشێوەیەکی راستەوخۆ چاودێریی منداڵەکانیان بکەن لە کاتی هاتووچۆیاندا بۆ ناوەندەکانی خوێندن.