هێزێكى ئه‌منیى عێراق چوه‌ خاكى سوریاو چالاكییه‌كى ئه‌نجامدا

هێزە ئەمنییەکانی عێراق بەهەماهەنگی لەگەڵ هەواڵگریی سووریا، ئۆپەراسیۆنێکی بۆ دەستگیرکردنی بازرگانانی ماددە هۆشبەرەکان لەنێو خاکی سووریا ئەنجامداو چەند تۆمەتبارێکیان دەستگیرکرد.

بەڕێوەبەرایەتیی گشتیی بەرەنگاربوونەوەی ماددە هۆشبەرەکان‌و کارتێکەرە دەروونییەکان بەهەماهەنگیی ڕاستەوخۆ لەگەڵ بەشی کۆنترۆڵکردنی ماددە هۆشبەرەکان لەسووریا ئۆپەراسیۆنێکی چۆنایەتیان لەنێو خاکی سووریا ئەنجامدا.
 
وەزارەتی ناوخۆی عێراق له‌وباره‌یه‌وه‌ ئاشكرایكردووه‌، یەکێک لەمەفرەزەکانی بەڕێوەبەرایەتییەکە چووەتە خاکی سووریاو لەڕێگەی هەماهەنگی هاوبەشی مەیدانی‌و هەواڵگرییەوە، توانیی دەستبەسەر 320 کیلۆگرام ماددەی هۆشبەردا بگرێت، ژمارەیەک تۆمەتباری داواکراوی نێودەوڵەتی دەستگیربکات کە بەشێکن لەتۆڕەکانی قاچاخچێتی سنووربەزێن.

عێراق چەندین ڕێککەوتن‌و یاداشتی لێکتێگەیشتنی هاوبەشی لەگەڵ وڵاتانی دراوسێ بۆ بەرەنگاربوونەوەی بازرگانی بەماددە هۆشبەرەکان واژۆکردووەو جارجاره‌ش ئۆپەراسیۆنی هاوبەش بۆ دەستگیرکردنی بازرگانانی ئەو ماددانە ئەنجامدەدەن، ماوەیەک لەمەوبەر "ئۆپەراسیۆنێکی چۆنایەتی سەرکەوتوو لەگەڵ کوه‌یت ئەنجامدا، جگە لەئۆپەراسیۆنەکانی دیکە لەگەڵ ژمارەیەک وڵاتی دراوسێ، وەک بەشێک لەهەماهەنگییە ئەمنی‌و هەواڵگرییە بەردەوامەکان بۆ بەرەنگاربوونەوەی ماددە هۆشبەرەکان.